Ақтау портының ауқымы

солтүстік бағытта кестеге сәйкес кеңейіп келеді Каспийдегі Ақтау теңіз портын солтүстік бағытта кеңейту жобасы бойынша жолдың жоғарғы жағын төсеу жөніндегі барлық жұмыстарды құрылысшылар 1 шілдеге қарай аяқтауды жоспарлап отыр, деп хабарлады «ҚТЖ» ҰК» АҚ-тың баспасөз қызметі. Үш айлақ – астық, кон­тей­нерлік және бас жүктер үшін айлақтар құрылысы қазір­дің өзінде іс жүзінде аяқта­лып қалды. Астық терми­на­лының барлық алты сақтау шұңқыры көтеріліп, құрал-жаб­дықтарды монтаждау жұ­мыстары соңғы белесіне жеткен. Төртінші айлақ – порт фло­тына арналған айлақ жұ­мыс­тарын тәмамдау жақын араға белгіленген. Қазіргі кезде электрмен қам­тамасыз етудің сыртқы жұ­мыстары жүзеге асыры­луда. Сыртқы электр желі­лері тартылып, ішкі алаңдық транс­форматорлы подстан­са жеткізілуде және құрас­ты­рылуда. Теміржол желісі арқылы мұнай өткізгішті көшіру жұмыстары да қарқынды жүріп жатыр. – Негізгі әкімшілік ғи­ма­ратына арналған металл құрылғылары құрылыс алаңы­на 25 маусымға дейін жет­кізілетін болады, – дейді құ­рылысшылар. Әкімшілік ғима­ра­ты­ның, санитарлық-эпиде­мио­логиялық қызмет көрсету орталығының, материалдық-техникалық қоймалардың, құрал-жабдықтар қоймасы мен көлікжайдың іргетасы құрылысы жүргізілуде. Со­ны­мен бір мезгілде, портпен байланыстыратын автомобиль жолын төсеу жүріп жатыр. – Қарқын аса жоғары. Кес­теден қалмауға тырысудамыз, – дейді бас мердігердің өкілі. Ақтау халықаралық сау­да теңіз портын солтүстік ба­ғыт­та кеңейту жобасын жүзеге асыру клиенттер үшін жаңа да заманауи қызмет көрсетуді қамтамасыз етіп, Ақтау пор­тының өткізу қабілетін құрғақ жүктерді 3 миллион тоннаға дейін, ал контейнер жүктерін 1,5 миллион тоннаға дейін ұлғайтуға мүмкіндік береді.