Әрбір тоғызыншы бала Алматыда өмірге келеді

Осы аптада оңтүстік астанада да «Мерейлі отбасы» жалпыұлт­тық байқауы қалалық кезеңінің қорытындысы шығарылды. Байқау барысында үш отбасы жеңім­­­паз атанды. Олар – ҰОС арда­гер­лері Калининдердің отбасы мен Дудаевтардың медициналық әулеті және көпбалалы Қадыровтар. Үлгілі отбасыларды марапат­тау салтанатына Алматы әкімі Ахметжан Есімовтің өзі келіп, қызықты шараға қоғамдық ұйымдардың, отбасыларды әлеу­меттік қолдау бірлестіктері мен дағдарыстар орталықтарының өкілдері қатысты. Мегаполис басшысы мем­ле­кеттің мүддесімен қолға алынған осынау байқаудың мәні жайлы сөз қозғады. Әкім әрбір жанның өз ша­ңырағында адамгершілік қа­сиеттерді ұстанып, неке өмір­шең­дігін үлгі етуі, дәстүрлерді сый­лауы – жалпы отбасының мәрте­бе­сін арт­тыруда барынша маңыз­ды әрі кө­кейкесті екендігін атап өтті. «Осынау отбасылық фес­ти­валь­дің маңызы өте зор. Биыл былтырғы байқауға қарағанда екі есе көп отбасылар қатысты. Жарысқа қатысып отырған отбасылардың барлығы түрлі кәсіптің, этностың және еңбегімен абыройға бөленген әулеттің өкілдері», – деді Ахметжан Есімов. Мемлекет отбасыларға жан-жақты қолдау көрсетуде. Нәрес­те өмірге келген кезде бір реттік жәрдем ақша және бала бір жасқа толғанша әлеуметтік жәрдем көрсетіледі әрі көпбалалы аналар да жәрдем ақша алады. «Қолжетім­ді баспана-2020» мемлекеттік бағдарлама аясында Алматыда 800-ден астам көпбалалы және жас отбасы өзге де әлеуметтік жағынан қорғалатын тұрғындармен бірге пәтер кілттерін алды. Қала басшысы жеңімпаз отбасыларына жүлделерін тапсыру барысында Алматыдағы отбасылық-демографиялық жағдайдың оң динамикасын атап өтті. Мысалы, соңғы 5 жыл ішінде мегаполис тұрғындарының орташа өмір сүру жасы 4 жылға артып, 74,6 жасты құраған (ерлер – 70,2, әйелдер – 78,3). Дүние есігін ашып жатқан сәби­лердің өсу динамикасы да тұрақ­ты. Мысалы, өткен жылы Алматы­да 42 мың нәресте дүниеге келген, бұл – еліміздің әрбір тоғызын­шы баласы. Ана өлімі 6 есе, ал сәби өлімі 2 есе төмендеген. Айнаш ЕСАЛИ, «Егемен Қазақстан». АЛМАТЫ.