«Мархабат Байғұттың туғанына 80 жыл» жобасының жетекшісі, «Медиакратия» қоғамдық бірлестігінің төрағасы Ғалымжан Елшібайдың айтуынша, бұл қаламгердің 80 жылдығы аясындағы дүниелердің бастамасы ғана. Қаламынан қаншама көркем шығарма туған жазушы атын ұрпақтар жадында сақтау үшін бастаманың маңызы ерекше. Журнал ұлт әдебиеті мен мәдениетінің дамуына септігін тигізіп, тақырыпта, жаңашыл шығармалар жариялауға ден қояды. Сонымен бірге әдебиет, руханият тақырыбындағы мәселелерді қаузап, танылмай жүрген жас таланттарға қолдау білдіреді.
Markhabat.kz ақпараттық порталында жазушының жеке фотоархиві, сұхбаттары, әңгіме, повестері, қаламгер туралы жазылған дүниелер жарияланады. Астанадағы Л.Н.Гумилев атындағы Еуразия ұлттық университетінде белгілі ғалым, академик, алаштанушы Дихан Қамзабекұлы жетекшілік жасайтын диссертациялық комиссияда Мархабат Байғұттың шығармашылығын зерттеуге арналған екі кандидаттық диссертация қорғалды. Бұл да көңілді жадыратарлық жаңалық. Яғни мархабаттану жолға қойылды деуге негіз бар. «Алдағы уақытта қазақ әдебиетіндегі іргелі саланың біріне айналатынына сеніміміз мол» деді жоба жетекшісі Ғ.Елшібай.
«Мархабат» журналының бас редакторы болып белгілі қаламгер, журналист Оралхан Дәуіт тағайындалды. Басылым редакторының айтуынша, «Мархабат» бұған дейін жарық көріп келген «Тұран-Түркістан» журналының жалғасы. Себебі «Тұран-Түркістанның» дүниеге келіп, оқырманға жол тартуына жазушы Мархабат Байғұт тікелей атсалысқан. Журналдың әр нөмірі 2 мың данамен тарайды.
Кеште Шымкент қалалық мәслихатының төрағасы Бахадыр Нарымбетов сөз алып, қаламгердің қазақ әдебиетіне ғана емес, түркі әдебиетіне де өзіндік қолтаңбасын қалдырғанын атап өтті. Кезінде Мархабат Байғұттың қоластында қарапайым маман болып жұмысын бастаған ол Махаңның шарапатын көп көргенін жеткізді. Мәслихат төрағасы жазушының өркениетті жастар көбейіп келеді, бірақ көркем ниетті жастар азайып барады деген сөзін мысалға келтіріп, өскелең ұрпақтың ниеті көркем болу үшін қаламгердің әңгімелерін оқуға шақырды.
Түркістан облысы әкімінің орынбасары Ертай Алтаев әкімдік тарапынан жазушының 80 жылдығын атап өтуге байланысты іс-шаралар жоспары қабылданғанын айтты. Сондай-ақ түркі дүниесіне танымал шығармаларын «Мархабат» журналы арқылы насихаттаудың, дәріптеудің мүмкіндігі туғанын мәлімдеді. Әкім орынбасары сөз соңында облыс әкімдігі атынан жазушының жары Қыздаркүл апамызға құрмет көрсетіп, иығына қамзол, басына орамал жапты.
Жамбыл облысы Ш.Мұртаза атындағы руханият және тарихтану орталығының директоры Жасұлан Әбдіхалық жаңа басылымның жарық көруіне орай өңір басшысы Ербол Қарашөкеевтің құттықтау хатын жеткізді. Орталық жетекшісі өз сөзінде облыста қолға алынған «Әулиеата – кітап оқитын өңір» жобасы аясында қаламгер шығармалары да бәйгеге қосылатынын баяндады. Шығармашылықта шекара болмайды деген ол ұлттық деңгейге көтерілген Шерхан Мұртаза мен Мархабат Байғұттай қос жазушының шығармаларын бірдей насихаттау керек деген ой білдірді.
Шымкент қаласы әкімінің орынбасары Сәрсен Құранбек оңтүстіктен шыққан талантты қаламгер Мархабат Байғұт ізгіліктің, әділдіктің үлгісін көрсеткен, туын тіккен дарынды тұлға болғанын атап өтті.
«Қарымды қаламгердің 80 жылдығына орай қалалық әкімдік ауқымды іс-шаралар жоспарын әзірлеп отыр. Соның ішінде жазушының өмірі мен шығармашылығына арналған ғылыми конференция да бар. Президент Қасым-Жомарт Тоқаевтың бастамасымен іске асып жатқан «Әділетті Қазақстан», «Адал азамат» тұжырымдамаларын түсіндіру үшін көркемсөз шебері Мархабат Байғұттай жазушының шығармаларын оқыту керек. Махаң көзі тірісінде елім деп еңіреп, жұртым деп толғанып өткен біртуар азамат еді» деді қала әкімінің орынбасары С.Құранбек.
Жиында сондай-ақ қаламгердің жары Қыздаркүл апамыз сөз сөйлеп, Махаңның үйде де, түзде де өзгермейтін бірқалыпты қарапайым биязылығы туралы ой толғады. Жазушының замандасы, ақын Нармахан Бегалы да дарабоз қаламгердің әдебиетке сіңірген еңбегі туралы айтты.
Мархабат Байғұт жазушылығымен қатар көптеген тың бастамалардың, қоғамда кеңінен қолдау тапқан тамаша идеялардың авторы, бастамашысы болды. Мәселен, «Ырыс алды – ынтымақ» жобасы оңтүстік өңірдегі ең айтулы рухани жобалардың бірі ретінде танылды. «Таупістелі тағылымы», «Бозарықтан Бозторғайға дейін» секілді іс-шаралары да қоғамдық ой-пікірдің дүр сілкінуіне үлкен қозғау салды.
ШЫМКЕНТ
