Сурет:РИА Новости / Михаил Кутузов
Сатылатын валюта сомасы Ұлттық банк алтын сатып алу үшін жүргізген теңге эмиссиясының көлеміне баламалы болады.
«Шетел валютасындағы эмиссияның бір тоқсандық көлемiнiң баламасы келесi тоқсан iшiнде iшкi валюта нарығында бiркелкi сатылады. Болжамды деректер бойынша, басым құқық шеңберінде 2025 жылы сатып алынатын алтынның жоспарлы көлемі 70 тонна немесе алтынның қазіргі уақыттағы бағасы кезінде 6 млрд доллар болады деп бағаланып отыр», делінеді ҰБ мәлімдемесінде.
Ұлттық банкке аффинаждалған алтынды міндетті сату туралы 2011 жылы енгізілген норма еліміздің алтын-валюта резервтерін толықтыруда және алтын өндіру саласын дамытуда маңызды қадам бола отырып, едәуір оң нәтижеге қол жеткізуге мүмкіндік берді дейді мамандар.
Алтын-валюта резервтерінің мөлшері 2024 жылдың соңына қарай тарихи ең жоғары көрсеткіш – 45,8 млрд долларға жетті. Елде аффинаждалған алтын құймаларын өндіру көлемі айтарлықтай ұлғайды. Бұл жаңа компанияларға халықаралық деңгейде танылуға мүмкіндік берді. Мысалы, «Тау-Кен Алтын» ЖШС аффинаж зауыты Лондон бағалы металдар нарығы қауымдастығының құйма сапасына тән халықаралық стандарт бойынша аккредиттеуден өтті.
