«Ютарияның» Жезқазған, Қарағанды қалаларындағы автоматтандырылған жабдықтармен жарақтандырылған 2 заманауи тігін фабрикасы мен Астана қаласындағы тоқу өндірісі нарыққа кеңінен танымал. Жезқазған, Сәтбаев, Қарағанды, Балқаш, Астана қалаларында жалпы аумағы 3 мың шаршы метрді қамтитын орталық қоймаларының болуы компанияның зор қуаты мен мол мүмкіндігін айғақтайды. Компания жылына 1 800 мыңнан аса тігін бұйымын шығарады. Бұл озық технологияны өндіріске енгізіп, қолданудың арқасында мүмкін болып отыр.
Металлургия, тау-кен, мұнай-газ, химия, теміржол, энергетика салаларының қызметкерлері үшін арнайы киімдер, ер, әйел мен балалар киімдері, күнделікті қолданысқа арналған тоқыма бұйымдары, барлығы 500-ден астам киім үлгісін ұсынады. Германияның Durkopp Adler, Pfaff, Amf Reece, Жапонияның Shima Seiko, Epson, Mimaki, Juki, Tajima, Түркияның Abitech, Tesan, Қытайдың ZOJE тәрізді заманауи озық тігін технологиялары компания өнімдерінің «Сапа бәрінен де жоғары» дейтін ұранына сәйкес болуын қамтамасыз етуде. Әрине, сол технологияның тілін тауып жүрген кімдер? Өзіміздің қыз-жігіттер. Сәуле Бақытжанқызы мамандарды компания есебінен оқытып, тәрбиелеуге баса көңіл бөледі.
Өндірісті басқарудың автоматтандырылған жүйесі шикізат түскен сәттен бастап дайын өнімді сатуға дейінгі, яғни жұмысты оңтайландыру, бақылау, есеп жүргізуді толық бақылауға мүмкіндік береді. Компания кәсіпорындарында енгізілген цифрлық технологиялардың бірін «Ютария» мамандарының өздері әзірлеген. «Yutariya Smart Technologies» деп аталатын бұл автоматтандырылған бағдарлама жеке қорғаныс құралдарын беруді жоспарлау мен есепке алуға арналған.
Аяғынан нық тұрған компания бірнеше инвестициялық жобаны жүзеге асырды. 2012 жылы Жезқазған қаласындағы тігін өндірісі кеңейтілді. Заманауи тігін, пішу, кестелеуге арналған автоматтандырылған жабдықтар орнатылды. Жаңа инвестицияның нәтижесінде 250 жұмыс орны ашылды. Сол жылы компания тағы бір инвестициялық жобаны жүзеге асырды. Моноқалаларды дамыту бағдарламасы шеңберінде Шығыс Қазақстан облысында, Қарағанды, Балқаш, Сәтбаев қалаларында «Индустриялық қызмет комбинаты» деп аталатын кешен құрылды. Соның аясында тапсырыс берушілерге, қарапайым тұрғындарға тазалау, қызмет көрсету сервисінің өндірістік циклі ұсынылды. Бұл жобаны жүзеге асыруға 180 млн теңге жұмсалып, жаңадан 350 жұмыс орны ашылды.
2011–2013 жылдары «Астана – жаңа қала» еркін экономикалық аймағында «KazTexExpo» автоматтандырылған өндірістік кешенінің құрылысы жүргізілді. «Индустрияландыру картасы» мемлекеттік бағдарламасына енгізілген бұл жобаны жүзеге асырған «Ютария» компаниясы болатын. Соның нәтижесінде, 350 жұмыс орны ашылып, бұл жобаға 560 млн теңге көлемінде инвестиция құйылды. Мұнда тігіншілік, тоқыма, эксперименттік цехтар жұмыс істеп, компьютерлік бағдарламалар іске қосылды. Киім үлгілерін жобалау жүйесі енгізілді. «Astana Ютария ltd» ЖШС мұнда жұмыскерлерге арналған киімдерден бастап бизнес өкілдеріне де жарасымды киім үлгілерін ұсынды. Әскери киімдер тігуге де мемлекет тапсырысын жеңіп алды.
200 млн теңге инвестиция жұмсап ұйымдастырылған көлік-логистикалық орталығының аумағы 4 600 шаршы метрді құрайды. Жүктің дер кезінде жеткізілуін қадағалап, қамтамасыз ету мақсатында орталықтандырылған диспечерлік қызмет құрылды. Орталық ғимараты күрделі жөндеуден өткізілді, жаңаша жабдықталды. Орталықта 47 жүк көлігі тұрақты тасымалмен айналысады, бұған қоса теміржол қызметі де пайдаланылады.
2022 жылы 2 500 шаршы метр аумақты алып жатқан көтерме-тарату орталығын ұйымдастырды. Бұған жұмсалған 802 млн теңге инвестиция өзінің тиімділігін байқатқан соң, компания қазір 150 млн теңге қаражат қарастырып, осындай тағы бір орталық ұйымдастырып жатыр. Былтыр желтоқсанда компания қолдауымен Жезқазған қаласында «Ulytau Creative Hab» ашылды. Ұлытау облысында креативті индустрияны дамытуға ықпал ететін мәдени мұра мен заманауи технологияларды біріктіретін хаб жаңа жобаларды іске асыратын стартаптар мен шағын және орта бизнеске қолдау көрсетеді. Өңірдегі креативті индустрияны дамытуды мақсат еткен хаб электронды және кеңсе жабдықтарымен, кітапханамен, жиһазбен жабдықталды. Мұнда қазір 3D fashionLab – яғни, киімді моделдеу бойынша ЗD зертханасы, сондай-ақ, зергерлік, лазерлік, қолөнершілер, домбыра мен қобыз шеберханалары, Kazakh Ou Lab, Steppe Art Lab, Qazaq Heritage Lab, Steppe Tradition Lab, e library, Qazaq Style Lab, Palette Lab, digital Lab орналасқан. Хабтың жұмыс істеуіне жайлы жағдай туғызу үшін «Ютария» 15 млн теңге жұмсады және 400 шаршы метр аумақты тегін ұсынды. Мақсат – аймақтағы кәсіпкерлердің креативті жобаларын жүзеге асыруға жәрдемдесу. Нәтижесінде, жаңадан 50 жұмыс орны пайда болды.
«Нарық әлеміне енгенімізге ширек ғасырға жуықтады. Уақытпен бірге өстік, өркендедік. Шағын және орта кәсіпкерлікті дамытуға мемлекет тарапынан жасалған қамқорлықтың көп шарапаты тиді. Кәсіпкерлік жолын кезінде қандай қиындықпен бастағанымыз есімнен кетпейді. Бүгінде «Ютария» құрамында 700-ден аса жұмыскері бар ірі өндірістік инновациялық компанияға айналды. Біздегі орташа жалақы 323 мың теңгені құрайды. Компания 2021-2024 жылдары бюджетке 3 325 256 мың теңге салық төлеген екен. Бұл біздегі өндірістің деңгейін көрсетеді. Біз әлеуметтік бағыт ұстанамыз. Көптеген қайырымдылық шарасына қатысамыз, демеушілік көрсетеміз. Компания қызметкерлері мен жұмыскерлері де негізінен Қарағанды және Ұлытау облысынан шыққан жергілікті мамандар», дейді Сәуле Бақытжанқызы.
Ұлытау облысы
