ПЕТРОПАВЛ. 18 маусым. Облыс әкімі Ерік Сұлтанов орталық алаңда өткен «Қазақстан балалары–нұрлы жолмен» салтанатты шарасына қатысып, үздік мектеп бітірушілерді ақшалай сыйлықтармен марапаттады. Бұл туралы әкімдіктің баспасөз қызметі хабарлады.
Биылғы оқу жылында «Алтын белгiні» 37 түлек алса, 23 түлек үздік аттестат иегері атанды. Орташа балл 77,88-ден айналып, Аққайың, Уәлиханов, Тимирязев, Қызылжар аудандары, Петропавл қаласы алдыңғы орыннан көрінді. Республикалық, халықаралық байқаулар мен олимпиадалардың жеңімпаздары мен жүлдегерлері атанған 72 оқушы ҰБТ-дан босатылды. 8 оқушы атаулы грантқа ие болды.
«Біз бүгін «Қазақстан балалары - нұрлы жолмен» атты үздік мектеп бітірушілерін салтанатты марапаттау рәсіміне жиналдық. Ел Президенті Нұрсұлтан Назарбаев «Нұрлы жол» экономикалық саясатын жүзеге асыруда жас ұрпаққа үлкен үміт артады. Сіздер - еліміздің, өңіріміздің болашағы, оның басты әлеуеті болып табыласыздар», дей келіп, Ерік Хамзаұлы 123 балл жинаған қазақ-түрік лицейінің 11 сынып оқушысы Әсел Шараповаға ақшалай сыйлық пен онубукты сыйға тартты.
Өзге озат түлектер де сый-сипаттарға кенелді.
Өмір Есқали.
Дерек,сурет: Солтүстік Қазақстан облыстық әкімдігінің баспасөз қызметі.
