Коллажды жасаған – Зәуреш СМАҒҰЛ, «EQ»
Қазірге дейін 7 мың км жолдың құрылысы аяқталды. Қарағанды – Алматы, Талдықорған – Өскемен, Ақтөбе – Қандыағаш және Атырау – Астрахан күре жолдарында құрылыс жұмысы бітті. Үш ірі инфрақұрылымдық жоба жүзеге асырылды – Бұқтырма су қоймасы арқылы өтетін көпір (Шығыс Қазақстан), Шақпақ ата асуындағы қос жолды туннель (Түркістан облысы), Шамалған стансасындағы теміржол өткелі (Алматы облысы). Бұл жобалар көлік өткізу қабілетін еселеп арттырып, логистикалық қызмет сапасының жақсара түсуіне ықпал етеді. Бұқтырмадағы көпір 7 ауданды байланыстырса, Шақпақ атадағы туннель қолайсыз ауа райына қарамастан, үздіксіз әрі қауіпсіз көлік қозғалысын қамтамасыз етеді. Жоба – «Батыс Еуропа-Батыс Қытай» халықаралық көлік дәлізінің бір бөлігі. Ал ұзындығы 6 км болатын Шамалған стансасындағы теміржол өткелі көліктердің қауіпсіз өтуіне жағдай жасайды.
Елдегі көлік-логистикалық қызметті әртараптандыру мақсатымен жалпы ұзындығы 1 100 км болатын 3 ірі теміржол құрылысы жүзеге асырылып жатыр. Олар – «Достық-Мойынты», «Алматы айналма темір жолы», «Дарбаза-Мақтаарал» магистралі. Жобаларды жүзеге асыру отандық өнімнің үздіксіз экспортын кеңейтуге жол ашып, транзиттік әлеуетті бекемдей түседі.
Суретті түсірген – Ерлан ОМАР, «EQ»
Отандық теміржол көлігі – транзиттік әлеуетті дамытудың көшбасшысы. Былтыр ел аумағы арқылы транзитпен 400 мың ЖФЭ (20 фундтық эквивалент) контейнерлері тасымалданды. Еліміздің Қытайдағы логистикалық терминалының көмегімен Қытай-Еуропа бағытында тасымалдау көлемі 28 есе өсті. Сианьда 330-дан аса контейнерлік пойыз жөнелтілді.
«Транзиттік бағыттарды дамыту шаралары жақсы нәтиже беріп жатыр. Еліміз халықаралық жүк ағындарына жоғары сапалы және жылдам қызмет көрсететін жаһандық логистикалық жүйенің негізгі буынына айналды», дейді «KTZ Express» АҚ басқарушы директоры Әсем Мұхамедиева.
Қазір ұлттық компания көлік дәліздерін белсенді дамытып, инновацияларды енгізіп, қолданыстағы маршруттарды жетілдіріп жатыр. Транскаспий халықаралық көлік бағыты экспорт пен транзиттік тасымал келешегіне деген жарқын үмітті оятты. Сондай-ақ 2024 жылы Баку–Сиань бағыты бойынша 12 күндік рекордтық жеткізу мерзімімен алғаш рет контейнерлік пойыз кері жөнелтілді. Маңызды қанатқақты жобалар санатында Иран – Қазақстан – Қытай және Қытай – Қазақстан – Өзбекстан бағыттары да бар. «Қорғас – Шығыс қақпасы» құрғақ портының терминалында тасымалдауды айтарлықтай жақсартатын және жүкті зақымданудан қорғайтын көлік құралдарын контейнерлеу қызметінің енгізілуі де – құптарлық құбылыс.
Алдағы уақытта жалпы ұзындығы 4,7 мың шақырым жаңа жол жобалары кезең-кезеңімен іске асырылады. Оның 3,7 мың шақырымы I санатты, ал қалған 1 мың шақырым II санатты жолдар болады. Осы жылы құрылысы басталатын жобалар қатарында «Ақтөбе – Ұлғайсын» (234 шақырым), «Қарағанды – Жезқазған» (572 шақырым), «Сарыағаш қаласының айналма жолы» (102 шақырым), «Қызылорда қаласының айналма жолы» (20 шақырым), «Атырау – Доссор» (86 шақырым), «Рудный қаласының айналма жолы» (16,9 шақырым), «Жаңаөзен – Кендірлі» (156 шақырым), «Петропавл қаласының айналма жолы» (8 шақырым) бар.
Бұл бастамаларды жүзеге асыру арқылы жергілікті бизнесті ынталандырып, кәсіпорындар көкжиегін кеңейтеді дейді сарапшылар. Сонымен бірге көпжолақты жолдар жол-көлік оқиғаларының алдын алып, оларды азайтуға да ықпалын тигізеді. Ең бастысы логистикалық мүмкіндіктерді әртараптандыру ісі ілгерілей түседі.
Биыл жаңа жол жобаларын іске асыру аясында 31 мың жұмыс орны ашылып, қосымша инвестиция тартылмақ.
