Соңғы қысқы Азиада осыдан жеті жыл бұрын Жапонияның Саппоросында өткен еді. Сол жарыста биатлоншылар 6 алтын, 4 күміс, 2 қоланы олжалап, айды аспанға бір-ақ шығарды. Осы жолы да дәл сол спорт түрі өкілдерінің жолына үлкен үмітпен қарап отырмыз. Қытайда 10 жерлесіміз өнер көрсетеді. Солардың арасынан Дүниежүзілік универсиаданың жеңімпазы Вадим Куралес, аталған жарыста екі реттен жеңіс тұғырына көтерілген Александр Мухин мен Әсет Дүйсеновтің әлеуеті аса жоғары бағаланады. Команда сапында кезінде Азия ойындарында алтыннан алқа таққан Ольга Полторанина мен Дарья Климина сынды атақтары алысқа жайылған ардагерлер де бар.
Еліміз Азиадаға қатысқан кезден бері өрелі өнерімен өз жанкүйерлерін қуантып келген шаңғышылар екені сөзсіз. Алайда Жапонияда олар тым сүреңсіз өнер көрсетті. Саппородағы сәтсіздіктің «кездейсоқтық» екенін дәлелдеу үшін 12 спортшымыз Харбинге аттанды. Олар – Надежда Степашкина, Дарья Ряжко, Камила Елғазинова, Ксения Шалыгина, Ангелина Шурыга, Мария Люфт, Ілияс Исабек, Наиль Башмаков, Ернар Нұрысбеков, Олжас Климин, Владислав Ковалев, Константин Борцов. Осылардың арасынан кемінде екі-үшеуінің бас жүлдеге таласуға қауқары жетеді.
Білікті бапкер Мәдіғали Қарсыбековтің еңбекқорлығы мен табандылығының арқасында еліміздің шорт-трегі зор биікке көтерілді. Бүгінде күллі әлем біздің өрендермен санасады. Харбинде Денис Никиша, Абзал, Алина Әжғалиевтер, Әділ Ғалиахметов, Яна Хан бастаған 12 саңлақ жарыс жолына шығады. Жоғарыда есімдері аталған спортшылардың барлығы да талай дүбірлі додада дараланған. Д.Никиша Олимпия ойындарында жеңіс тұғырына сынық сүйем қалғанда сүрінсе, былтыр Роттердамда ұйымдастырылған әлем чемпионатында күміс медальді мойнында жарқыратты. Өзге шорт-трекшілер Әлем кубогінің кезеңдік сайыстарында олжаға кенелді. Сол себепті де алдағы жарыстан жерлестеріміздің қоржыны бос қайтпайтынына сенімдіміз.
Конькишілер сайысында Надежда Морозова, Алтай Жәрдембекұлы, апалы-сіңлілі Шумековалар өз жанкүйерлерін қуантуға тиіс. Мәнерлеп сырғанауда Михаил Шайдоров бар. Жастар арасындағы әлем чемпионатының күміс жүлдегері деген атағы бар 20 жастағы алматылық өрен бүгінгі таңда ересектер дуында да елеулі табысқа қол жеткізіп жүр. Михаилдың мықтылығын мойындатып, нағыз ерлейтін тұсы осы. Софья Самоделкинаға да сенім артылып отыр. Былтыр ғана еліміздің азаматтығын алған 17 жастағы ресейлік легионер жуырда ғана Туринде өткен Дүниежүзілік Универсиадада қола медальді қоржынға салды. Бұл – Софья бабында деген сөз. Шайдоров пен Самоделкинадан бөлек, Диас Жиренбаев, София Фарафонова, Байсангур Датиев, Гаухар Наурызова сынды төл түлектеріміз мұз айдынына шығады.
Еліміз осыған дейін Азия ойындарына алты рет қатысты. Сол жарыстардың барлығынан шайбалы хоккейшілеріміз олжалы оралды. 1996, 1999, 2011, 2017 жылдары бас жүлдені қанжығаға байласақ, 2003, 2007 жылдары күміспен күптелдік. Харбинде ҚХЛ-да күш сынасып жүрген Андрей Шутов, Темірлан Гайтамиров, Данил Бутенко, Әділ Бекетаев, Самат Данияр, Артем Королев, Роман Старченко, Кирилл Савицкий, Әлихан Өмірбеков, Кирилл Панюков, Руслан Оспанов сынды «Барыстың» 11 сайыпқыранынан бөлек, Ресей мен еліміздің чемпионаттарында бақ сынап жүрген ойыншылар өнер көрсетеді. Жігіттерден тек алтын күтеміз. Осы спорт түрін серік еткен бұрымдыларымыз да осал емес. Бұған дейінгі Азиадада қыздарымыз 3 алтын, 3 қола иеленді. Бұл жолы да бас жүлдені олжалауға барынша күш салуымыз керек. Сондай-ақ спортшыларымыз тау шаңғысы, керлинг, ски-альпинизм, фристайл-акробатикадан өтетін бәсекелерде бақ сынайды.
Жуырда Үкіметтің отырысында Туризм және спорт министрі Ербол Мырзабосынов Харбинде жалауы желбірейтін аса жауапты жарысқа сапалы дайындалу мақсатында жоғарыда аталған спорт түрлерінен ұлттық құрама командаларымыз 137 оқу-жаттығу жиынына қатысқанын, спортшылардың шеберлігін шыңдау үшін Нидерланд, Польша, Словения, Беларусь, Ресейден арнайы шақырылған кеңесші-бапкерлердің көмегіне жүгінгендерін, дайындық жоғары деңгейде өткенін тілге тиек етті. Олай болса, алдағы қысқы Азиадада еліміздің өрендері үздіктер санатынан көрінуге тиіс.
- Азиадаға ең көп спортшылар Астана қаласынан қатысады. Харбинге аттанған елордалықтардың саны – 37. Өзге өңірлерден бақ сынайтын өрендеріміздің саны: Алматы қаласы – 27, Шығыс Қазақстан – 18, Ақмола – 17, Қостанай – 9, Солтүстік Қазақстан – 7, Шымкент – 6, Павлодар – 4, Алматы облысы – 3, Қарағанды – 3, Абай – 3, Маңғыстау – 2, Жетісу – 1, Батыс Қазақстан – 1.
- Биылғы Азия ойындарына Түркістан, Ұлытау, Жамбыл, Қызылорда, Ақтөбе, Атырау облыстарының бірде-бір өкілі қатыспайды.
- Қытайға аттанған саңлақтардың кейбіреуі бұған дейінгі Азиадада жеңіс тұғырының ең биік сатысына көтерілген. Мәселен, 2011 жылы Астана мен Алматыда алауы тұтанған аламанда Ольга Полторанина (биатлон), Евгений Рымарев, Роман Старченко, Татьяна Королёва (шайбалы хоккей) алтын медальді иеленсе, 2017 жылы Саппорода Дарья Климина (биатлон), Кирилл Савицкий, Иван Степаненко, Дмитрий Гренц (шайбалы хоккей) дәл сол межеден көрінді.
- Осыған дейінгі Азия ойындарында мына спортшылар жүлдегерлер санатына қосылды: Абзал Әжғалиев (Астана-Алматы, 2011 жыл – қола, шорт-трек), Ольга Тихонова, Мәдина Жанбосынова (Саппоро, 2017 жыл – қола, шорт-трек, аралас эстафета), Арина Щёколова, Мәдина Тұрсынова, Малика Алдабергенова, Пернеш Әшімова, Татьяна Королёва (Саппоро, 2017 жыл – қола, шайбалы хоккей), Дарья Климина (Саппоро, 2017 жыл – 2 қола медаль, биатлон).
- Еліміз құрамасы сапындағы ең қарт спортшы – Денис Власов. Ски-альпинизмді серік еткен саңлақтың жасы 41-де. Ең жас өрен – София Зубкова. Шайбалы хоккейден сайысқа түскелі жатқан бойжеткеннің жасы 17-де.
