Суретті түсірген – автор
Әуелде аталған өндіріс ошағында су мен жылу құбыры ғана шығарылады деп жоспарланған. Алайда алғашқы қадамдар сәтті болған соң ба, басшылық өнім түрін көбейтуді көздеген. Сөйтіп, қосымша цехта электр энергиясының кабельдік жүйесін қорғауға бағытталған үш қабатты құбырлар өндіріле бастады. Цехтың іші тап-таза. Әр жұмысшы өзіне жүктелген аппараттың құлағында тұр. Бірі түйіршікті шикізатты құрылғыға қарай өткізсе, енді бірі қызылды-жасылды түймелерді басып, әлденені реттеп отыр. Ең соңындағы жұмысшылар құбырдың диаметрін өлшеп, тысқа жөнелтеді. Сырт жақта қаз-қатар жиналған құбырларда қисап жоқ. Ертең-ақ сатылып кетеді дейді мамандар.
– Диаметрі 400 миллиметрге дейін жететін құбырлар жасаймыз. Тәулігіне шамамен 3,5 мың метр су құбырын өндіруге қауқарымыз жетеді. Энергетика саласына қажетті құбырларымыздың басты артықшылығы – олар отқа және соққыға төзімді материалдардан жасалады. Яғни мұндай құбыр жанбайды, сынбайды. Полиэтилен құбырдың сыртқы қабаты түрлі физикалық әсерге, жоғары қысымға төтеп беретіндей етіп жасалған. Жалпы, күніне осындай құбырдың 1 100 метрін шығара аламыз, – дейді кәсіпорын бас директорының орынбасары Тұрсынбек Мұсаханов.
Зауыт Шығыс Қазақстанды ғана емес, Абай облысы, Талдықорған, Павлодар облыстарына да өнімдерін жеткізеді. Өндірісте заманауи технологиялар ғана қолданылатындықтан, өнім сапасы да жоғары. Қазір Шығыста бұл бағытта жұмыс істеп жатқан мұндай кәсіпорын жоқтың қасы. Тіпті республикада полиэтилен құбырларын шығаратын зауыт саусақпен санарлық.
Жаңа кәсіпорыннан жылына шамамен 3 600 тонна өнім шығарылады. Болашақта бұл көрсеткішті бес мыңға жеткізу жоспарланған.
– Облысымызды құбыр жүйесімен толықтай қамтуға шамамыз жетеді. Алдағы уақытта республикамыздың өзге өңірлеріне де шығуды ойластырамыз. Ол үшін өндіріс көлемін ұлғайту қажет. Келешекте қосымша цех ашып, жұмысшы санын арттырамыз, – дейді Тұрсынбек Мұсақанов.
Қазір полиэтилен құбыр зауытында 25 адам жұмыспен қамтылған. Олардың біразы – арнайы оқудан өтіп, құбыр жасаудың қыр-сырын меңгерген мамандар. Сұранысқа қарай құбыр көлемінің түр-түрін әзірлейді. Қазір шығып жатқан энергетикалық құбырдың беріктігі сондай, экскаватордың күрегі тиіп кетсе де бүлінбейді екен. Ішкі қабаты өртке қарсы. Сондай-ақ газ бен су жүйесі үшін жасалып жатқан құбырлар да өте берік. Соған қарамастан ел бойынша нарықтағы бағаны төмен ұстап отыр. Баға демекші, зауыт толық инвестициялық негізде ашылды. Кәсіпкер азаматтар қаланың қиыр шетінде тұрған бос ғимараттарды сатып алып, зауытқа айналдырған.
– Үш ауысыммен жұмыс істейміз. Цехта тыным жоқ. Сұраныс артып жатса, бұл аумаққа тағы зауыт саламыз, – дейді Тұрсынбек Мұсақанов.
Шығыс Қазақстан облысы
