Сурет: tolqyn.kz
Дәрігерлердің айтуынша, жаңа туған нәрестенің жағдайы сағат сайын ушыға түскен. Оның терісі қатайып (склеродермия), бауыры мен көк бауыры айтарлықтай үлкейген екен. Кәсіби мамандар шұғыл іске кіріссе де, бастапқыда жағдайды қалыпқа келтіру қиынға соққан. Минуттар жылжып, секундтар сырғыған сайын баланың халі мүшкіл бола түскен. Алайда мамандар ілкі сәтке де сәби өмірі үшін күресті тоқтатпаған.
«Жүргізілген зерттеу жұмысының нәтижесінде балада ауыр цитомегаловирус (ЦМВ) инфекциясы анықталды. Бұл инфекция бауырдың қызметін бұзатыны белгілі. Әрине, жағдайдың мәз емес екенін бірден түсіндік. Жергілікті мамандар мұндай күрделі жағдаймен бұрын-соңды кездеспеген еді. Бірақ қолдан келгенше көмек көрсеттік. Еш аянып қалған жоқпыз», дейді дәрігерлер.
Жағдай тым күрделі, әрбір минут өте қымбат екенін терең түсінген мамандар емдеу шараларына дереу кіріскен. Ақ халатты абзал жандардың әрекеті әуелі зая кеткендей көрінгені де жасырын емес. Өйткені ем-дом шаралары жасалғанына қарамастан, бастапқы күндері сәбидің денсаулығында айтарлықтай оң өзгеріс байқала қоймады. Бірнеше күн бойы зәр шығара алмаған нәрестенің реанимациядан шығуы мұңға айналды. Әйткенмен сертке берік мамандар барлық қиындыққа қарамастан, оның өмірі үшін күресті жалғастыра берді.
«Бастапқыда қалыптасқан жағдай бір сәтке болсын үміт жібін үзгендей көрінгені рас. Алайда бірнеше күннен кейін күткен нәтижеге қол жеткіздік. Сәби зәр шығарды, қан айналымы айтарлықтай жақсарды. Арада он күн өткен соң алғаш рет ана сүтімен қоректенді. Сол сәтте еңбегіміз ақталғанын айқын сезіндік. Баланың бауырының қызметі біртіндеп қалпына келіп, көп ұзамай жасанды тыныс алу аппаратынан ажыраттық», дейді мамандар.
Науқастың жағдайы тұрақталғаннан кейін мамандар оны одан әрі емдеу үшін облыстық көпбейінді балалар ауруханасына ауыстыру туралы шешім қабылдады. Бүгінде жағдайы жақсарған сәбидің ата-анасы бала өмірін арашалап қалған дәрігерлерге алғысын жаудырып жатыр.
Баланың өмірі үшін күрескен реанимация бөлімінің меңгерушісі Әуез Хасенұлы, Аида Жолдасбайқызы, Арайлым Сейдарапқызы бастаған дәрігерлердің жанкешті, табанды еңбегін ерекше айта кеткен жөн. Өңірде жаңа туған сәбиде бұрын-соңды кездеспеген дертпен күрескен олардың еңбегі зор.
ТАРАЗ
