Фото: Үкімет
Саммит аясында Ғалымжан Қойшыбаев «Қозғалмалы прогресс: тұрақты елдерді қалыптастырудағы мемлекеттік басқарудың тиімділігі» тақырыптық сессиясында сөз сөйлеп, онда мемлекеттік институттарды дамытудағы цифрлық трансформацияның шешуші рөліне тоқталды.
«Жылдам өзгеретін әлемде сын-қатерлерге тез бейімделіп, мемлекеттік қызметтерді тиімді көрсете білу және қоғамның сенімін сақтап қалу өте маңызды мәселеге айналып отыр. Қазақстанның тәжірибесі көрсеткендей, цифрлық трансформация мемлекеттік басқаруды жаңғыртудың негізгі факторы болып саналады. Бүгінде біз озық бағдарламалық жасақтама, жасанды интеллект, иммерсивті технологиялар, кванттық есептеу, робототехника және биоинженерияны қамтитын технологиялық революцияны көріп отырмыз», деп атап өтті ол.
Сапар барысында Ғалымжан Қойшыбаев БАӘ Министрлер кабинеті істері жөніндегі министрі Мұхаммед Абдалла Әл-Гергавимен келіссөздер жүргізді. Екіжақты серіктестіктің қазіргі жағдайы мен болашағы талқыланды. Мемлекеттік басқаруды дамыту және жаңғырту саласындағы бұрын қол қойылған ынтымақтастық туралы Меморандумды іске асыруға ерекше назар аударылды, оның аясында Қазақстан Үкіметінің Аппараты БАӘ Үкіметтік тәжірибе алмасу кеңсесімен өзара іс-қимыл жасайды.
Ынтымақтастық басталғаннан бері еліміздің мемлекеттік қызметшілері басқарудың озық әдістерін оқып, тәжірибе алмасты. Адами әлеуетті дамыту, цифрлық трансформация, жасанды интеллектті қолдану, бәсекеге қабілеттілікті арттыру және т.б. бойынша жұмыстар жүргізіліп келеді. Қазақстан Үкіметтік акселераторлардың (Government Accelerators) тәжірибесін зерделеп, озық әдістемелерді енгізіп жатыр.
Мұндай платформалар шеңберінде халықаралық өзара іс-қимыл мемлекетаралық байланыстарды нығайтуға және қазақстандық шешімдерді жаһандық деңгейде ілгерілетуге ықпал етеді. 2024 жылы отандық «Отбасының цифрлық картасы» жобасы БАӘ-дегі Дүниежүзілік үкіметтік саммитінде «Инклюзивті цифрлық трансформация» санатында 1300 өтінімнің арасында ең үздік деп танылды.
Іс-шараға бірнеше ел үкіметтерінің басшылары, халықаралық ұйымдардың өкілдері, мемлекеттік басқару саласындағы жетекші сарапшылар, сондай-ақ 100-ден аса елдің делегациялары қатысты.
