Фото: ҚР ТЖМ
Төтенше жағдай министрлігі Төтенше жағдайлардың алдын алу комитеті төрағасының міндетін атқарушы Әсет Жылқайдаров орталық мемлекеттік, жергілікті атқарушы органдармен бірлесе атқарылып жатқан су тасқынына дайындық барысын баяндады. Спикер тасқын қаупі еліміздегі 1 223 елді мекенге төнуі мүмкін екенін атап өтті. Қызыл суға қарсы 576 шақырым қорғаныш бөгені мен біліктері тұрғызылды. 822 шақырымдық дренаж жүйесі, тоғандар мен арық арналары тазартылып, бітелген көздері ашылды. Автомобиль, теміржол бойларында 960 суағар салынды.
– 74 өзеннің бойындағы қауіпті учаскелерінің 500 шақырымға жуық бөлігінің арнасын кеңейтіп, табанын тереңдету, жағалауды мығымдау жұмысы қолға алынды. Тасқын кезінде зардап шеккендерді қабылдауға 3,5 мыңнан аса пункт дайындалды. Су тасқынына жедел қамдануға 37 мыңнан аса адам қамтылып, 13 мыңнан аса техника, 4 096 су айдау, 640 жүзу құралдары бар азаматтық қорғау қызметтері құрылды. Азаматтық қорғаныстың әскери бөлімдерінің де дайындығы жоғары, құтқару авиациясы жедел кезекшілік атқарып отыр, – деді Ә.Жылқайдаров.
Су тасқынына қарсы штаб тәулік бойы жұмыс істейді. Мемлекеттік органдар, атап айтқанда, Ішкі істер, Қорғаныс министрліктері, Ұлттық ұлан, «Қазгидромет», «Қазсушар», «Қазавтожол» мамандары жұмылдырылған штаб әр өңірде бар. Сонымен қатар командалық-штабтық машиналар базасында төтенше жағдайлар туындауы мүмкін аймақтардан нақты ақпарат беру үшін жедел басқару топтары құрылды. Оңтүстік, батыс өңірлердің су тасқыны төнуі мүмкін учаскелерінде бекеттер қойылды. Олар тәулік бойы қалыптасқан жағдай туралы ақпаратты хабарлап отырады.
«Қазгидромет» мамандарының алдын ала болжауынша, еліміздің 9 өңірінде (Ақтөбе, Абай, Ақмола, ШҚО, БҚО, Қарағанды, Ұлытау, СҚО, Қостанай облыстары) көктемде су басу қаупі жоғары. «Апат айтып келмейді», спикер жалпы күштер мен құралдар дайын екенін атап өтті, төтенше жағдайға байланысты қауіпті өңірлерге күштер мен құралдарды жеткізу, халықты эвакуациялау, сондай-ақ авариялық-құтқару жұмыстарын жүргізу жөнінде тиісті шешім қабылданатынын мәлім етті.
