Балабақшалар көбейіп келеді

Жақында Ақтөбе қаласында бір күнде екі балабақша ашылды. «Батыс-2» шағын ауданында бой көтерген үш қабатты «Айлин» балабақшасының сәні мен салтанаты келісіп, жұтынып-ақ тұр. 320 орындық еңселі ғимараттың жалпы алаңы – 3714,6 шаршы метр. Балабақшада 12 топ жұмыс істейді. Осы заманғы үлгіде жабдықталған ғимараттың дербес трансформаторлық стансасы мен жылыту қазандығы бар. Мұнда қазір бір мезгілде 300 баланы қабылдаса, болашақта 500 балаға дейін тәрбиеленетін болады. Құны 850 миллион теңгені құрайды. Балабақшаның салтанатты ашылуында облыс әкіміАрхимед Мұхамбетов сөз алып, Елбасы Нұрсұлтан Назарбаев өткен жылғы «Нұрлы Жол – болашаққа бастар жол» атты Қазақстан халқына Жолдауында балабақшалардағы орын тапшылығын, үш ауысымды және апаттық мектептер мәселелерін шешуге айрықша тоқталғанын тілге тиек ете келіп, бүгінгі сәтті осы тапсырманы шешудің айқын мысалы ретінде атап өтті. Өңір басшысы бүгінгі таңда облыс­та балаларды мектепке дейінгі мекемемен қамту көрсеткіші 87 пайыз, яғни республикалық көрсеткіштен 10 пайызға жоғары болып отырғанын жеткізді. Бұл кәсіпкер Зәмзегүл Байма­ғамбетова мен жекеменшік серіктестігі бойынша салып отыр­ған төртінші мектепке дейінгі мекеме болып шықты. Оның балабақша меңгерушісі Гүлнар Мұратоваға су жаңа балабақшаның символдық кілтін тапсыруы да салтанатты сәттің ажарын аша түсті. Облыс әкімі Архимед Мұ­хамбетов «Заречный-4» елді мекеніндегі №47 «Нұр-Ай» мемлекеттік балабақшасының салтанатты ашылуына қатысушы ата-аналар мен бүлдіршіндердің қуанышына ортақтасты. «Бала­пан» бағдарламасы аясында салынған бұл нысан 150 балаға арналған. Құрылысты «Кварц спецсервис» ЖШС сапалы салып, қысқа мерзімде аяқтаған. Серіктестік директоры Айдын Есмұханов жинал­ған­дарды құттықтап, бала­бақша меңгерушісі Назгүл Балмағамбетоваға ғимараттың символдық кілтін салтанат­ты жағдайда тапсырды. Бала­бақшадағы 6 топтың әрқай­сы­сында 25 бала тәрбиеленетін бо­лады. Мұнда 50 адам тұрақты жұмыспен қамтылады. Балабақшада музыкалық зал, ойын және жатын бөлмелер, медициналық кабинет, асхана, кір жуатын бөлме бар, жаңа үлгідегі жиһаздармен және жабдықтармен жарақтандырылған. Меди­ци­налық блогта процедуралық жә­не дезинфекциялық құрал­дар­ды дайындайтын бөлмелер, сыртқы алаңында әр топқа ар­налған көлеңкелі шатырлар мен ойын алаңында шағын нысандар, спорттық-экологиялық алаңдар қарастырылған. Үстіміздегі жылы облыста 7 балабақша ашу жоспарланса, қазірдің өзінде екеуі пайдалануға берілді. Сатыбалды СӘУІРБАЙ, «Егемен Қазақстан». Ақтөбе облысы.