Сурет: finance.digitalbusiness.kz
Тоғыз жолдың торабында орналасқан Шу ауданында төрт түлік өсіруге ниетті тұрғындарға 100 бас мал берілді. «Атай» шаруа қожалығының басшысы Сәкен Атаевтың бас болуымен Абай ауылының тұрғыны Қалисұлтан Тілепбергенов пен Бақытжан Ботаевтың әрқайсысы 50 бас қой алды. Олар 3 млн теңге берешекті 5 жыл ішінде белгіленген ережеге сәйкес өтеуі тиіс.
«Ауылдастарымды қолдап, ауылдың дамуына үлес қосуға әрқашан әзірмін. Болашақта ауыл азаматтарына асыл тұқымды төрт түлік беру мәселесін де ойластырып отырмын. Ең бастысы жерлестердің іс бастауға ниет танытып отырғаны көңіл қуантады. Ниет болған жерде нәтиженің көп күттірмейтіні даусыз», дейді Сәкен Атаев.
Облыстық Ауыл шаруашылығы басқармасы басшысының орынбасары Төлебек Құлекеевтің айтуынша, тауарлы несие алған азаматтардың қарызды өтеуі үшін айтарлықтай жеңілдік қарастырылған. Мәселен, бірінші жылы төлем мәселесі бойынша демалыс жарияланса, одан кейін жыл сайын төлдің 50 пайызы негізінде өтем төлеуге міндеттеледі. Осылайша, бес жылда несие борышын өтейді. Жоба бойынша бірінші кезекте аз қамтылған отбасылар мен жұмыссыз жүрген азаматтарды қолдауға басымдық беріледі.
Шу ауданының өзге де кәсіпкерлері ауыл тұрғындарына тауарлы несие беруге құлшыныс білдіріп отыр. Олар кем дегенде 30 бас уақ мал, 15 ірі-қара және 10 жылқы ұсынуы тиіс.
Шалғайда орналасқан Мойынқұм ауданындағы «Үркер» шаруа қожалығының жетекшісі ауыл тұрғындарына 20 бас ірі қара мен 100 бас уақ мал беруге дайын екенін жеткізді. Ал жергілікті атқарушы билік өкілдері тауарлы несие алуға ниетті ауыл тұрғындарының тізімін жасақтап жатыр.
Ауыл шаруашылығы басқармасының мамандары жыл соңына дейін 80-ге жуық келісімге қол қойып, жобаны жандандыра түсеміз дейді.
Жамбыл облысы
