«Бірыңғай платформа барлық геологиялық ақпаратқа ашық қол жеткізуге мүмкіндік береді. Демек елдегі кез келген азамат аталған платформаға кіріп, халықтың жерасты байлығы қалай игеріліп жатқанын қадағалай алады. Платформада 22 мемлекеттік қызмет цифрландырылған. Іске қосылғаннан бері 506 өтінім өңделді. Жер қойнауын пайдаланудың бірыңғай платформасы көмегімен барлауға немесе өндіруге өтінім беруден бастап, оның аукционы мен лицензиясын беруге дейінгі үздіксіз үдеріс жүзеге асырылады», деді вице-министр Жәннат Дүбірова.
Платформада барлық геологиялық есептердің тізілімі, алғашқы кітаптар, соның ішінде реферат, есеп мазмұны, графикалық қосымшалар тізімі, жұмыс нәтижелері, қорытындылар, тұжырымдар, пайдаланылған әдебиеттер тізімі, тегін онлайн шолу және орындалған жұмыстарды түсіну үшін 60 000-нан астам есеп бар.
Мүдделі аумақ туралы қажетті ақпаратты алғаннан кейін пайдаланушыға қолданыстағы лицензиялар мен келісімшарттар, бос аумақтар, сондай-ақ аумақта жүргізілген геологиялық-геофизикалық барлау жұмыстары туралы ақпарат беріледі. Нақты қажетті геологиялық материалдарды сатып алу үшін жер қойнауын пайдаланушылар Ұлттық геологиялық қызметтің интернет-ресурсында өтінім береді. Өтінім 5 жұмыс күнінен кешіктірілмей өңделеді.
Ал бірыңғай мемлекеттік қызметтің интерактивті картасын бөлек атап өткен жөн. Соның арқасында әлеуетті жер қойнауын пайдаланушылар инфрақұрылымнан бастап геологиялық-геофизикалық есептерге дейін сұралған аумақтың толық бейнесін ала алады. Интерактивті карта жер қойнауын пайдалану үшін алып жатқан барлық аумақты қамтиды. Сондай-ақ аукционға қолжетімді аумақтарды орналастыруға мүмкіндік береді.
Жүйеде тиімділік пен ашықтықты арттыру мақсатында қатты пайдалы қазбалар бойынша берілген лицензиялар мен келісімшарттарға міндеттеменің орындалуын бақылау үдерісі цифрландырылған. Бұрын бұл бақылау қолмен жүзеге асырылатын.
Өнеркәсіп және құрылыс министрі Қанат Шарлапаевтың айтуынша, қазір елімізде жаңа көмірсутек кен орындарын ашуға мүмкіндік бар. Геологтер шартты отынның болжамды ресурсы шамамен 76 млрд тонна болатын 15 шөгінді бассейнді бөліп отыр. Бүгінде мұнай-газ өндірудің барлық көлемі игерілген 5 бассейнге тиесілі. Ең ірісі – Каспий маңы. Онда ресурстық базаның шамамен 80%-ы бар.
2026 жылдың соңына дейін 2,2 млн шаршы шақырым аумақта геологиялық-геофизикалық зерттеу жүргізу жоспарланған. Осы кезде мұндай зерттеу көлемі 1255,6 мың шаршы шақырымды құрайды.
