Солтүстік Қазақстан соты үкімді өзгеріссіз қалдырды

ПЕТРОПАВЛ. 19 маусым. Ауыр қылмыс жасағаны үшін бас бостандығынан айрылған Ақжар аудандық ішкі істер бөлімі басшысының орынбасары мен ауылдық учаскелік полицейге тағайындалған жаза өзгеріссіз қалды. Бұл туралы облыстық соттың баспасөз қызметі хабарлады. Оқиға өткен жылы болған. Миы шайқалып, ауруханаға түскен ер адамның жағдайын көрген медбикелер бірден полицияға хабар берген.  Алайда, жәбірленушіні соққыға жыққан күдікті табылысымен іс заңға қайшы бағытта өрби бастаған. Сотта белгілі болғандай аудандық ішкі істер бөлімі басшысының тергеу жөніндегі орынбасары К. Дайыров пен учаскелік полицей Қ.Үсенов күдіктіні алдап-қорқыту арқылы қомақты қаражатқа кенелмек болған. Олар оны қылмыстық жазадан босата алатындарына сендіріп, “қайырымдылық” қызметін 300 мың теңгеге бағалаған. Қолына кісен салынып, темір торға тоғытылатынын естіген күдіктінің келіспеске амалы қалмаған. Шарасыз күйге түскен ауыл тұрғыны сыбайлас жемқорлыққа қарсы күрес бөлімі қызметкерлеріне қайрылуға мәжбүр болған.  Қ.Үсеннов тиісті ақшаны алу үстінде құрықталған. Бұл кезде К.Дайыров әріптесін жанар-жағармай құю станциясының жанында күтіп тұрған. Сот үкімінде көрсетілгендей К.Дайыров кінәсін мойындамаған. Ал Қ.Үсенов оның бастамасы бойынша қылмысты жасыру фактісін әшкерелемек болған көрінеді. Облыстық аппеляциялық сот алқасы аудандық соттың К.Дайыровты – 4 жылға, Қ.Үсеновті 3 жылға бас бостандығынан айыру туралы үкімін қарай келіп, өзгеріссіз қалдырды. Өмір Есқали. Дерек: Солтүстік Қазақстан облыстық сотының баспасөз қызметі. Дерек: egemen.kz