Қызылжар мешіті ауызашар берді

ПЕТРОПАВЛ. 19 маусым. «Қызылжар» мешітінің бас имамы, облыстың уәкіл имамы Кенжетайқажы Бейсембайұлының ұйымдастыруымен 500 адамға арналып ауызашар берілді.   Қайырымдылық шараға аймақ басшысы Ерік Сұлтанов қатысты. Бұл туралы облыстық дін істері басқармасының мамандары хабарлады. Түркиядан Рамазан айын өткізуге арнайы келген Камил Гул қари Құран хатым бағыштады. Ерік Хамзаұлы өз сөзінде мешітке жиналған жамағатты оразаның басталуымен құттықтап, ұлтаралық, конфессияаралық татулық, бірлік тіледі. 15 жастағы жас қари Омардың да арабшаға жүйріктігі көрініп тұрды.  Алматыда  ұйымдастырылған Құран оқу жарысында көзге түскен ол  сүрелерден еш  мүдірмеді. Ауызашарда имандылық, қайырымдылық, оразаның сауабы, ислам дінінің мән-маңызы жайлы уағыздар айтылып, оның өткізілуіне белсене атсалысқан кәсіпкерлер құрметтелді. Солардың бірі Сермұхамбетқажы Оралұлына ерекше ілтипат көрсетілді. Қазақстан мұсылмандар діни басқармасының төрағасы, бас мүфти Ержанқажы Малғажыұлының алғыс хаттарына бір топ этномәдени бірлестіктер ие болды. Бұдан кейін 500 адамға дастархан жайылып, ауызашар берілді. Алдағы уақытта мұндай ізгі дәстүрді жекелеген мұсылман ұйымдары жалғастыруға ниет етіп отыр. Өмір Есқали. Дерекк: Солтүстік Қазақстан облыстық дін істері басқармасы. Сурет: egemen.kz