Кarate 1-Premier League – әлемдегі беделді турнирлердің санатына кіреді. Оған дүниежүзілік рейтингте 32 спортшының қатарына енетін саңлақтар ғана қатысады. Ел құрамасының 3 спортшысы кумите бағдарламасында жүлдеге қол жеткізді. Топта барлық қарсыласын ұтқан Мөлдір Жаңбырбай (50 кг) финалда Алжир спортшысы Силия Уикенмен тең түскен еді, бірақ қарсыласы алдымен ұпай иеленгендіктен жеңіс Силияның еншісіне жазылды. Мөлдір қаңтар айында Парижде өткен жылдың алғашқы премьер-лига турнирінде қола жүлдеге ие болды. Каратэ спортынан әйелдер арасында тұңғыш әлем чемпионы атағын иеленген саңлақтың келешегінен күтеріміз мол.
Жартылай финалда сүрінген Әсел Қанай (61 кг) мен Софья Берульцева (+68 кг) қола медаль үшін өткен айқаста қарсыластарын қапы қалдырды. Қыста Парижде өткен сайыста Әсел мен Софья финалда сүрініп, күміс медаль олжалаған болатын.
Ханчжоудағы додаға 68 елден 400 спортшы қатысты, Жапония –30, Италия – 29, Франция, Түркия елдері 21 спортшысын қосты. Karate 1-Premier League додасының келесі кезеңдері 18-20 сәуір аралығында Мысыр астанасы Каирде өтсе, 30 мамыр мен 1 маусым аралығында Марокконың Рабат қаласын дүбірге бөлейді.
