Сурет: pexels.com
Маңғыстау облысында да әлеуметтік осал топ өкілдерінің тұрғын үй жағдайын жақсарту жұмыстары жүйелі жүргізіліп келеді. Өңірде «Бақытты отбасы» және «Наурыз» сияқты мемлекеттік тұрғын үй бағдарламалары белсенді түрде іске асырылып жатыр. Дегенмен Ақтаудағы урбанизацияның жоғары деңгейін, халық санының қарқынды өсуін ескере отырып, тұрғын үйге деген сұраныс өзекті болып қала береді. Құрылыс көлемін арттыру ғана емес, жаңа тұрғын аудандарда инфрақұрылымның теңгерімді дамуын қамтамасыз ету маңызды. Сонда ғана тұрғын үй шын мәнінде жайлы болады.
Сонымен қатар мемлекет әлеуметтік инфрақұрылымды, әсіресе ерекше қажеттіліктері бар адамдарды оңалту, қолдау саласын дамытуға қатысты маңызды қадамдар жасалады. Президент құрылтайда Семей, Тараз, Кентау, Орал қалаларында заманауи оңалту орталықтары ашылғаны туралы айтты. 2026 жылға дейін Ақтөбе, Атырау, Көкшетау, Шымкент, Талдықорғанда оңалту орталықтарын салу жоспарланып отырғанын ерекше атап өтті. Бұл айтарлықтай жетістік болғанымен, мұндай мекемелерге деген қажеттілік әлі де жоғары. Бұл мекемелердің толыққанды жұмыс істеуі үшін білікті мамандармен, заманауи жабдықтармен, тиімділігі дәлелденген әдістермен қамтамасыз ету қажет. Маңғыстау облысында да ерекше қажеттіліктері бар адамдарды оңалтуға арналған мамандандырылған орталықтардың жетіспеушілігі байқалады. Өңірде аутизм спектрі бұзылған (АСБ), даму ерекшеліктері бар балалардың саны айтарлықтай көп, бірақ мамандандырылған мекемелер жеткіліксіз. Ата-аналар елдің басқа өңірлеріне жүгінуге мәжбүр. Бұл қаржылық, логистикалық қиындықтар тудырады.
Президент құрылтайда еліміз әлеуметтік мемлекет екеніне, сондықтан да білім беру, денсаулық сақтау салаларына инвестиция салуды жалғастыра беретініне, шын мұқтаж азаматтарға ғана көмек көрсетілуі керектігіне де баса назар аударды. Бұл бағдарламаларды мемлекеттік ресурстардың есебінен қаржыландыру аздық етеді. Оларға қайырымдылық ұйымдары мен жеке инвесторлардың қолдауы қажет. «Қазақстан халқына» қоры бұл салада оң нәтижелер көрсетіп отыр. Дегенмен осы бастамаларды іске асыруды жеделдетуге жергілікті билік органдары мен кәсіпкерлік секторын, әсіресе, бизнесті оңалту инфрақұрылымын тарту табысқа жетудің маңызды факторы бола алады.
Ерекше қажеттіліктері бар балаларды оқыту – мемлекет үшін қағидатты мәселе. Тек білімге қол жеткізуді қамтамасыз ету ғана емес, оның сапасын арттыру, инклюзивті білім беру жағдайларын жасау қажет. Осы мақсатта жыл соңына дейін балаларды кешенді қолдауды, оның ішінде білім беру, медициналық, әлеуметтік аспектілерді ескеретін жаңа заң әзірленуге тиіс. Маңғыстау облысында да инклюзивті білім беру мүмкіндіктерін кеңейту, жалпы білім беретін мектептерде арнайы сыныптар құру, мұғалімдерді ерекше қажеттіліктері бар балалармен жұмыс істеудің заманауи әдістеріне оқыту қажет.
Бұл шараларды жүзеге асыру кешенді тәсілді, ведомствоаралық өзара іс-қимылды талап етеді. Тек сонда ғана қойылған мақсаттарға қол жеткізуге, елімізде шын мәнінде қолжетімді, тиімді әлеуметтік қолдау жүйесін құруға болады.
Әсем КҮЛБАЕВА,
Президент жанындағы Қазақстан стратегиялық зерттеулер институтының бас сарапшысы
