«UBC Group» басшылығы 2023 жылы өндірістік алаңдарын Қазақстанда орналастыру туралы шешім қабылдап, жаңа зауыт салу үшін бірқатар өңір арасынан Түркістан облысын таңдаған. Жобаға сәйкес, бір шаңырақ астында өндірістік цехтар, қоймалар, әкімшілік және кеңсе ғимараттары орналасатын заманауи кәсіпорын бой көтереді. Жобаға салынатын инвестиция көлемі 30 млн еуроға дейін жетпек. «UBC Group» президенті Игорь Гуменныйдың айтуынша, компания – тоңазытқыш жабдықтарын өндіру саласында жұмыс істейтін және дамып келе жатқан Украинаның ең ірі өнеркәсіптік холдингтерінің бірі. Тұтынушылары – әлемнің түкпір-түкпіріндегі танымал брендтер мен ірі корпорациялар.
«Қолдау көрсеткен облыс әкімдігіне алғыс айтамыз. Тоңазытқыштар өндірісі жобасының сәтті жүзеге асатынына сенімдімін. «UBC Group» сусындар мен азық-түлікке арналған тоңазытқыш жабдықтарын өндіру, жарнамалық материалдарды әзірлеу және өндіру, жабдықтар мен техникалық үдерістерді жобалау және монтаждау, тоңазытқыш жабдықтарын жаңарту және қызмет көрсету, тауар мен қызметті сату сияқты бірнеше бағыт негізінде жұмыс істейді», деді Игорь Гуменный.
Түркістан облысының әкімі Нұралхан Көшеровтің сөзінше, бастама тікелей Мемлекет басшысының қолдауымен жүзеге асып жатыр.
«Мұндай заманауи өндіріс орнын ашу – облыс үшін маңызды экономикалық қадам ғана емес, сонымен қатар өңірдің инновация және заманауи технологияға дайын екенінің көрсеткіші. Кәсіпорын жаңа жұмыс орындарын құруға, өңірге қосымша инвестиция тартуға мүмкіндік бермек. Бастама – шетелдермен ынтымақтастықтың жарқын көрінісі. Біз жаңа жобаларға, жаңа инвесторларға қолдау көрсетуге дайынбыз», деді Нұралхан Оралбайұлы.
Өндіріс орнының ашылу рәсімінен кейін қонақтарға зауыт аумағына экскурсия ұйымдастырылды. Сондай-ақ Түркістанда 100-ден аса отандық және шет мемлекеттің бизнес өкілдерінің қатысуымен бизнес-форум өтті. Халықаралық форумға қатысушылар қатарында Украина, Түркия, Грузия, Қытай, Әзербайжан, Өзбекстан және еліміздің ірі компания иелері мен өкілдері бар. Аймақтың инвестициялық-экономикалық әлеуеті кеңінен таныстырылған форумда облыс әкімі жиынға қатысушыларды бірлесе жұмыс істеуге шақырды.
«Батыс пен Шығыс арасындағы сауда қатынастары, тиімді географиялық орналасуы және көптеген тарихи нысаны Түркістанды Орталық Азиядағы инвестиция мен туризмнің орталығына айналдыруға зор мүмкіндік береді. Қазір өңірдің инвестициялық қоржынында 2025–2028 жылдарға жоспарланған 110 инвестициялық жоба бар. Бұл жобалар 4,6 млрд долларға дейін инвестиция тартуға, 19 мыңнан астам жаңа жұмыс орнын құруға жол ашады. Сондай-ақ өңірде «Turan» арнайы экономикалық аймағы және инвестициялық алаңдар бар», деді облыс әкімі.
«Түркістан инвест» компаниясының басқарма төрағасы Өмірзақ Юсупов өңірдің инвестициялық әлеуетін таныстырып, ұсынылатын мүмкіндіктер туралы баяндады. Форумға қатысушылар пікір алмасып, шет мемлекеттерден келген инвесторлар бірлесе жұмыс істеуге ниет білдірді.
Облыста 210 мыңнан астам шағын және орта бизнес өкілі, оның ішінде 160-тан астам компания шетелдік инвесторлардың қатысуымен жұмыс істейді. 80 мыңнан астамы – шаруашылық және фермерлік қожалық. Кейінгі 6 жылда Үкімет пен облыс әкімінің қолдауы нәтижесінде шамамен
9 млрд доллар көлемінде инвестиция тартылды. Оның ішінде 63%-ы – жеке инвестиция. Инвестиция өнеркәсіп, жылжымайтын мүлік, ауыл шаруашылығы, туризм және жаңартылатын энергия көздері сияқты салаларға бағытталды.
Түркістан облысы
