Авторлық құқық «KEGOC» АҚ-ға тиесілі
«Самұрық-Қазынаның» басқарма төрағасы Нұрлан Жақыповтың айтуынша, 2024 жылы Қордың компаниялары тобына инновациялар мен технологиялық шешімдерді жедел енгізу мақсатында жаңа ғылыми-техникалық саясат қабылданған. Осылайша, ғылыми жобаларды зерттеу, іріктеу, оларды өндіріске енгізу үшін қаржыландыру жұмыстары қолға алынды.
Былтыр «Самұрық-Қазына» тобына кіретін компаниялар ғылыми-зерттеу және тәжірибелік-конструкторлық жұмыстарды қаржыландыруға 11,9 млрд теңге бөлген. Оның ішінде 7,7 млрд теңгеден астам қаражат ғылыми-техникалық қызметтің Бірыңғай операторы – «Самғау» орталығына бағытталды.
2024 жылдың соңына қарай ғылыми жобаларды қаржыландыру бойынша 4 шарт жасалып, олар биыл аяқталады деп жоспарланып отыр. Тағы 24 жоба мақұлданып, іріктеудің келесі кезеңі бойынша қарастырылып жатыр.
Болжам бойынша, 2,8 миллиард теңгеге іске асырылып жатқан 4 жобаның экономикалық тиімділігі алдағы 5 жылда 196 млрд теңге болмақ. Бұл аталған жобаларды іске асыру құнынан 70 есе артық. Демек пайдасы ұшан-теңіз.
Мысалы, осындай жобалардың бірі – «Қаражанбасмұнай» компаниясының жер қойнауын қауіпсіз әрі экологиялық барлауға арналған жобасы. Импульстік сейсмикалық барлау технологиясы мұнайдың қосымша қорын анықтауға және «Қаражанбасмұнай» кен орнында өндірілетін мұнай қорын 2 млн тоннаға дейін арттыруға мүмкіндік береді.
Ал «KEGOC» компаниясының басшысы Нәби Айтжановтың айтуынша, соңғы 5 жылда аталған ұйым 8 ғылыми-зерттеу және тәжірибелік-конструкторлық жобаны іске асырған және олардың көбі грант есебінен қаржыландырылған. Компания жыл сайын ғылыми-техникалық шешімді талап ететін технологиялық тапсырмаларды анықтап, оларды шешу жолдарын қарастырады.
«Қазатомөнеркәсіп» 2023 жылы жалпы құны 6,6 млрд теңгеге 51 жобаны жүзеге асырған. Бұл туралы ұйым басшысы Мейіржан Юсупов мәлімдеді. Аяқталған жобалардың қатарында – жөндеу-қалпына келтіру жұмыстарында фторсутекті қышқылды пайдалану технологиясы, аммиакты сүзу жүйесі, Иіркөл кенішінің жұмысында роботтандырылған шешімдерді қолдану сияқты жобалар бар.
Ал Қызылорда облысындағы «Ақшабұлақ» кен орнында ілеспе газды қайта өңдеуге арналған кешенді инновациялық шешім әзірленді. Нәтижесінде, жеңіл көмірсутектерді, оның ішінде сапалы пропан-бутанды бөліп алуға мүмкіндік беретін технологияның арқасында ілеспе газды қайта өңдеу көрсеткіші 33%-ға артты. Бұл жоба жергілікті өндірісті дамытып, импортты алмастыру мәселесін де шешуге ықпал етеді.
2025 жылы «Самғау» орталығы Ғылым және жоғары білім министрлігімен ынтымақтастықты жалғастырмақ және бірлесіп технологиялық сессиялар өткізуді жоспарлап отыр. Сонымен қатар «Samruk Business Academy» ұйымымен бірге қызметкерлердің ғылыми бағыттағы біліктіліктерін арттыру мақсатында арнайы курстар ұйымдастырады.
Жиын соңында «Самұрық-Қазына» басшысы Нұрлан Жақыпов Қор компанияларындағы барлық ғылыми қызметкерлерді айтулы мерекемен құттықтап, ғылым мен өндірістің өзара байланысын әрі қарай дамыту жұмыстарына белсенді түрде атсалысуды тапсырды.
