Инвестор тартудағы олқылық

Былтыр желтоқсанда Кә­сіп­­керлік және ин­дустрия­лық-инновациялық дамыту басқармасының басшысы Ас­пандияр Сейсебаев 2024 жылдың ІІ тоқсанның қо­ры­­тындысында облысқа 21,7 млн доллар тікелей шетелдік ин­вестиция тартылды деп мә­лімдеді. Арада бір ай өткен соң Президент Жамбыл облысында тікелей шетелдік инвестиция үлесі төмендегенін тілге тиек етті. Жамбыл облысының әкімі Ербол Қарашөкеев шетелдік инвестиция тарту­ға белсене кіріскенімен, өңір­дегі іс өнбей тұр. Салаға жауап­ты лауазымды азаматтар тиісті жұмысты дұрыс үйлестіре ал­мағандай көрінеді.

Аспандияр Сейсебаевтың жыл соңындағы баяндамасына тағы бір үңілсек, Қытай сапарында әңгімеге арқау болған Байзақ ауданы аумағында трактор құрастыру жобасы туралы ләм-мим демейді. Дәл осы мәселе біраз уақыт бұрын жергілікті мәслихат сессияларының бірінде де көтерілген болатын. Депутаттардың бірі әңгімеге арқау еткен шаруа туралы жыл соңында толыққанды мәлімет берілер деп едік. Баяндама ішінде ол да жоқ болып шықты.

Өңір басшысының Қытай­ға барған кезде шетелдік инвесторлар тартуға баса назар аударғаны талас тудырмайды. Алайда әкім бастаған жұмыс­ты басқа жауапты азаматтар жүйелеуі, жүзеге асыруы керек емес пе? Қытайда қойын дәптерге түртілген жобалардың тағдыры бізді де қызықтырады, толғандырады. Алайда оған бас ауыртып жатқандар шамалы секілді. Әйтпесе, трактор құрастыру жобасы бо­йынша қандай келісімдер жүр­гізілгені, жобаның қашан басталып, қашан аяқталатыны, инвесторларға қандай жағдай қарастырылып жатқаны жа­рия етілуі керек қой? Әлде қол­ға алынуға тиіс болған, БАҚ-та жарияланған жобалардың ­соңы сиырқұйымшақтанып кетті ме? Ол жағы әзірге белгісіз ­болып тұр.

Биыл облыс әкімі бастаған топ Түркияның Мерсин провинциясына ат басын бұрып, инвестициялық форумға қа­тысып қайтты. Түркия сапары кезінде облыс басшысы іскер топ өкілдеріне өңір­дің инвестициялық мүм­кін­дігін таныстырыпты. Мер­синнің индустриялық-өнер­кәсіптік аймағын аралаған жамбылдықтар іргелі өндіріс­термен танысып, бірлескен кәсіпорындар құру мәселе­сін жан-жақты талқылаған көрінеді.

Бір қарағанда, инвесторлармен келіссөз жүргізу ойдағыдай секілді көрінеді. Облыс әкімі жыл ішінде ондаған шетелдік инвестормен кездесіп, оларға қолдау көрсетілетінін айтады. Сондай-ақ инвестициялық жобаларды сүйемелдейтін «Zhambyl Invest» дирекциясы да бар. Олар да қолдан келгенше қамданып жатыр. Соған қарамастан, өткен жылы өңірге тікелей шетелдік инвестиция тарту көрсеткіші төмендегені көңілге кірбің түсіреді. Дерекке сенсек, «Zhambyl Invest» дирекциясында түркиялық инвесторлармен тікелей жұмыс істейтін арнайы бөлім де бар екен.

Жауапты басқарма осы жылы индикаторды ойдағыдай орын­дай ала ма? Әлде биыл да ше­телдік инвестиция тарту көр­сеткіші кемшін түсе ме? Кім білсін... Қалай болған күнде де Президент назарындағы мәсе­ленің ойдағыдай орындалмауы ешкімге абырой әпермесі анық.

Жамбыл облысы