Ресей наградалары тапсырылды

Тарих көші тереңдей түскенімен Ұлы Отан соғысындағы ерлік жаңғырығы жарқырай беретіні анық. Өйткені, зұлмат жылдардың нәубеті мен қуанышы жүректерден мәңгілік өшпек емес. Еңбекшілдер ауданынан майдан жорықтарына бес мыңнан астам адам аттанса, олардың жартысынан көбі жарияланбаған соғыстың құрбаны болды. Жылдар жылжып, Жеңіс солдаттарының қатары селдірегенімен, оларға деген жалпыхалықтық құрмет қашанда биік тұрады. Қазақстан жауынгерлерінің батылдығы мен қайсарлығын дос­тастық мемлекеттері де жоға­ры бағалауда. Жуырда Ресей Феде­рациясының атынан Омбы облы­сының заң шығарушы жина­лысының депутаты Анатолий Казак Еңбекшілдер ауданында болып, бірқатар майдангерге Ұлы Жеңістің 70 жылдығы құрметіне шығарылған мерекелік медальдар мен ескерткіш сыйлықтарды табыс етті. Депутат наградаларды Михаил Калантарьян, Николай Посягин сияқты ардагерлердің үйінде тапсырса, Үлгі ауылдық клубында майдангер Зинаида Мельникті марапаттау салтанаты өткізілді. Ал 2014 жылы тың және тыңай­ған жерлерді игерудегі еңбегі үшін Ресей медалін иеленген Қызыл­ұйым ауылындағы тыл ардагері Рахымғали Әубәкіров (суретте) енді осы елдің екінші наградасын омырауына тақты. Аудан әкімдігінде болған қабылдауда өңір басшысы Асқар Қиықов ресейлік депутат Анатолий Анто­нови­чке ел атынан алғыс білдірді. Бақберген АМАЛБЕК, «Егемен Қазақстан». Ақмола облысы, Еңбекшілдер ауданы.