«BalaTurkvizyon» халықаралық ұлттық ән байқауының Көкшетаудағы 13-ші аймақтық іріктеу туры өте тартысты өтті. Байқауға қалалар мен елді мекендердегі балалардың әртүрлі шығармашылық ұжымдары қатысты.
– Көкше мен Арқа өңірі қашаннан ән мен жырдың ұйып тұрған өлкесі, – деді бізбен әңгімесінде байқаудың төрешілер алқасының төрағасы әрі продюсері Кентал. – Әлия Назарбаеваның «Жандану әлемі» қоры игі бастамаға ұйытқы болды. Мақсат – ән және сахна саласындағы дарынды балалардың жолын ашып, бүлдіршін балаларға арналған қазақша 16 әннің тұсауын кесу. Бұл орайда менімен бірге Көкшетауға келген Медеу Арынбаев, Кенжебек Жанәбілов сынды белгілі әнші, сазгерлер талғам биігінен көрінген талапкерлерге қолдау көрсетпек.
Байқау барысында Степногор қаласындағы «Presto» музыкалық студиясының, Атбасар ауданындағы «Айдана» халықтық ән-би ансамблінің өнеріне ризашылық білдірілді. Әйткенмен, жұлдызды төрешілер алқасы Шортанды ауданынан келген он үш жасар әнші Айман Аманның шығармашылығына жоғары баға беріп, балауса өнерпазды республикалық байқаудың жартылай финалында бақ сынауына мүмкіндік берді. Арнайы музыкалық білімі жоқ болса да Айман қыз өзінің бұлбұл үнімен қазақ, орыс және француз тілдеріндегі әндерді құйқылжыта шырқады. Ол енді үлкен қаладағы «Жұлдызды үйде» дайындық жұмыстарына кіріспек. Ал 16-17 қыркүйек күндері кәсіби төрешілер алқасы мен телекөрермендер Ыстамбұлдағы І Халықаралық «BalaTurkvizyon» ән байқауының Гранд-финалында ел намысын қорғайтын балауса өнерпаздың атын атайтын болады. Бұл орайда, ақмолалықтар Айман Аманға айрықша үміт артады.
Бақберген АМАЛБЕК, «Егемен Қазақстан».
Ақмола облысы.
