Атырауда жалған кәсіпорындар 380 млн. теңге салықтан жалтарған

АТЫРАУ. 4 тамыз. Атырау облысында заңсыз пайда табу мақсатымен құрылған жалған кәсіпорындар бюджетке 380 миллион теңгенің салығын төлеуден жалтарып келіпті. Бұл туралы облыстық прокуратура хабарлады. Прокуратура органдарының қызметкерлері бюджетке түсуі тиіс салықты төлеуден жалтарған жалған кәсіпорындардың бар екенін анықтады. Тексеру барысында анықталған жалған кәсіпорындардың тіркелуін заңсыз деп тану туралы сот органдарына талап-арыз жолданды. Қазірге дейін сот шешімімен осындай 14 талап-арыз қанағаттандырылды. Атырау облыстық прокуратурасы басқарма басшысының міндетін атқарушы Темірбек Дәржановтың мәлім еткеніндей, сот «Марабаева Т» жеке кәсіпкерлігінің, «Жаңабыл», «Шылақ-Элитсервис» және «Ромеда–Стройпроект» серіктестіктерінің қызметтерін тоқтатуға шешім шығарды. Өйткені, бұлардың 380 миллион теңге көлеміндегі салықты төлеуден жалтарып келгені дәлелденіп отыр. Жолдасбек Шөпеғұл. Дерек: Атырау облыстық прокуратурасы. Сурет: palata.otgroup.kz.