Ақмолада полицей алдымен әйелін, сосын өзін атып өлтірді

  АСТАНА. 4 шілде. Ақмола облысында полицей әйелі мен өзін атып өлтірді. Осыған байланысты қылмыстық іс қозғалды. Бұл туралы ras.kz хабарлады. Ақмола облыстық ішкі істер департаменті баспасөз қызметінің жетекшісі Гүлнар Пинчуктың басылымға берген дерегіне қарағанда, Бұланды аудандық ішкі істер бөлімінің қызметкері әуелі әйелін, содан соң өзін атып өлтірген. «Төтенше жағдай Макинск қаласында орын алды. Ол жөніндегі ақпар аудандық бөлімнің кезекші бөліміне келіп түскен», – деді Гүлнар Пинчук. Әйелі мен өзін атып өлтірген полиция қызметкерінің жасы 31-де болған, полиция капитаны шеніндегі ол учаскелік инспектордың көмекшісі болып қызмет істеген. Қаза тапқан жұбайлардың артында үш жасар балалары қалған. «Оқиға орнына тергеу-жедел тобы, сондай-ақ өзіндік қауіпсіздік басқармасы мен Ақмола облыстық ішкі істер департментінің басшылығы шұғыл аттанды. Қылмыстық кодекстің 99-бабы, 1-бөлігі бойынша қылмыстық іс қозғалды», – дегенді қосты Гүлнар Пинчук. Баспасөз қызметінің басшысы сонымен бірге тергеу толық аяқталғанға дейін «аталмыш төтенше жағдайдың жайы мен себептері туралы бір нәрсе айта қою қиын» екенін ескертіп өтті. «Тергеу нәтижелері туралы БАҚ-тарға қосымша хабарлаймыз», – деді ол. Айта кетуіміз керек, Ақмола облысында осыған ұқсас оқиға биылғы көктемде де орын алған болатын. Целиноград аудандық ішкі істер бөлімінің 24 жастағы тергеуші келіншегі 25 наурызда өзін өзі өлтірді. Аға лейтенант жұмыс кабинетінде табельдік қарумен өзін өзі атқан. Анықталмаған ресми деректер бойынша, полиция қызметкерінің суицид жасауына отбасылық кикілжің әсер еткен. Талғат Райымбек. Дерек, сурет: ras.kz.