Заңдылықты сақтау – басты назарда

Үстіміздегі жылдың 26 сәуіріне белгіленген Қазақстан Республикасы Президентінің сайлауына байқау жүргізетін Республикалық қоғамдық комиссияның облыстық филиалы өз жұмысын бастады. Осыған орай, облыстық «Қазақстан – Ақтөбе» телеарнасының мәжіліс залында қоғамдық комиссияның ашылуы­на арналған брифинг өткізілді. Оның құрамына белгілі ғалымдар, қоғам қайраткерлері, БАҚ пен жастар ұйымдарының өкіл­дері кірді. Олар электоралды науқанның ашық әрі шынайы өтуіне бақылау жүргізетін бола­ды. Брифингте комиссия төр­ағасы, Қ.Жұбанов атындағы Ақтө­бе өңірлік мемлекеттік универ­ситетінің экономика және құқық инс­титутының директоры Халел Құсайынов бұл туралы жан-жақты баяндады. Ол комиссия жұмысының бас­ты бағыты облыста сайлау ту­ралы заңның сақталуына канди­дат­тардың сайлауалды штабтарымен, БАҚ және сайлау комиссияларымен бақылау жүргізу екенін тілге тиек ете келіп, комиссия мүшелері сайлау науқанына қатысушы барлық кандидаттарға бірдей жағдай жасалуын қамтамасыз ететінін, сайлау үдерісін бұзудың кез келген әрекеттерінің жолын кесіп, оларды уақтылы түзетіп, әкімшілік ресурстар тарапынан орын алуы мүмкін әрекеттерді болдырмау бойынша жұмыстар жасайтынын жеткізді. Қоғамдық комиссия мүше­лері­нің басым бөлігінің аталған салада тәжірибесі бар, олар 2011 жылы өткізілген президенттік сайлау мен 2012 жылғы парламенттік сайлауға байқаушы есебінде белсенді қатысқан азаматтар. Сатыбалды СӘУІРБАЙ, «Егемен Қазақстан». Ақтөбе облысы.