Мәуліт айы – Мұхаммед пайғамбардың дүниеге келген қасиетті айы. Биыл пайғамбарымыздың туған күні діни күнтізбеге сәйкес 3-4 қыркүйекке тұспа-тұс келіп отыр.
Ислам діні бойынша Мәуліт мерекесінің мәні – Пайғамбарымыздың өнегелі өмірін насихаттау, жастарды имандылыққа, адамгершілікке және ізгілікке тәрбиелеу. Бұл айда ораза ұстау міндетті емес. Мұсылмандар үшін ораза парыз болып саналатын жалғыз ай – Рамазан. Ал Мәуліт айында сауапты амалдар жасап, Құран оқу және салауат айту сүннет саналады.
«Мәуліт айы – Пайғамбарымыздың өнегелі өмірін насихаттап, сүннет амалдарын дәріптеудің, дініміздің асыл құндылықтарын ұлықтаудың берекелі мүмкіндігі. Бұл айда мешіттерде Аллаға мадақ айтылып, Пайғамбарымызға салауат жолданады, мәуліт жыры оқылады. Салауат айту – өзіміз үшін қайырлы әрі мол сауапқа жетелейтін ізгі амал. Сондай-ақ Пайғамбарымыздың сүннетін ұстану – Алланың разылығына жақындатар жолдың бірі», деді Бас мүфти Наурызбай қажы Тағанұлы.
