Кеше Мемлекет басшысы Нұрсұлтан Назарбаев Астанадағы Қошқарбаев және Жұмабаев көшелерінің қиылысында орналасқан «Жерұйық» саябағындағы генерал И.В.Панфиловтың ескерткішін ашу рәсіміне қатысты.
Салтанатты рәсім барысында Елбасы барша ардагерлер мен ел тұрғындарын Отан қорғаушы күнімен және Ұлы Жеңістің 70 жылдық мерейтойымен құттықтады.
«Бұл – Кеңес Одағының Батыры Иван Панфиловқа ғана арналған ескерткіш емес, фашизмге қарсы күреске қатысқан барлық қазақстандықтарға, ұрыс даласында қаза тапқандарға және аман-есен оралып, елді дамытуға орасан еңбек сіңірген ардагерлерге деген тағзым», – деді Қазақстан Президенті.
Нұрсұлтан Назарбаев генерал-майор Панфиловтың басшылығында болған 316-шы атқыштар дивизиясы Алматы облысында құрылғанын еске салды.
«Осы дивизияның 28 панфиловшы жауынгері Мәскеу түбіндегі ең сұрапыл шайқасқа қатысты. Дивизия қатарында Кеңес Одағының Батыры Бауыржан Момышұлы болды. Олар фашистердің танктермен жасаған шабуылына бірге тойтарыс берді. Сол себепті де, генерал Панфиловтың есімі Ұлы Отан соғысы тарихында қалды. Біздер, қазақстандықтар, оларды өзге батырлармен бірге қастер тұтып, жадымызда сақтаймыз», – деді Мемлекет басшысы.
Қазақстан Президенті бүгін бар сый-құрмет пен тілек соғыс ардагерлеріне арналатынын атап өтті.
«Еліміз қажетті қолдауы мен жәрдемін көрсетуде. Әрқайсыңыз мемлекеттің қамқорлығындасыздар. Мен әрқайсыңызды да Жаңа жылмен құттықтауға тырыстым. Біз ардагерлерді мерекелерде ғана емес, барлық уақытта ардақтайтын боламыз, өйткені, сіздер бұған лайықсыздар. Бүгінгі ұрпақтың тұрақты, тәуелсіз әрі тату Қазақстанды құруы – сіздердің ерліктеріңіздің өтеуі. Еліміз қалай өркендеп келе жатқанын көріп отырсыздар, сондықтан бекерге соғысып, қан төкпеген екенбіз деп ойлауларыңызға толық негіз бар. Арамызда аман-сау жүріп, жастарды патриоттық пен Отанға адалдық рухында тәрбиелей беріңіздер!» – деді Нұрсұлтан Назарбаев.
Кеңес Одағының Батыры, генерал-майор И.В.Панфилов ескерткішінің авторы – мүсінші Ренат Әбенов. Биіктігі 2,5 метрлік ескерткіш қоладан құйылған. Оның орта тұсында гүл шоқтарын қоятын арнаулы тақта бар.
Монументтің шығыс жағында аллея бойымен Мәскеуді қорғау кезінде шейіт болған 28 панфиловшы-жауынгердің туған жылдары мен қаза тапқан күндері жазылған, табиғи граниттен жасалған табақша-плиталар қойылыпты. Бұл жерден Кеңес Одағы Батырының «Алтын Жұлдызы» медалі бедерленген 28 стеланы да көруге болады.
Айналасы көгалдандырылған және жасыл желекпен көмкерілген аллеяға сәуле шығаратын 2 арнайы қондырғы мен 16 шамнан жарық түсіріледі.
Ләйла ЕДІЛҚЫЗЫ,
«Егемен Қазақстан».
Суреттерді түсіргендер
С.БОНДАРЕНКО, Б.ОТАРБАЕВ.
