Фото: «ҚазАвтоЖол»
Жоба Қытай Экспорт-импорт банкінің және Республикалық бюджеттен бірлесіп қаржыландыру арқылы жүзеге асырылған. Қайта жаңарту жұмыстары Абай және Шығыс Қазақстан облыстарының аумағындағы 10 учаске мен 2 жол пайдалану бөлімшесін қамтыған.
Учаскелерде негізгі құрылыс және асфальтбетон төсеу жұмыстары толығымен аяқталған. Ал жол бойындағы инфрақұрылымды абаттандыру қараша айының соңында аяқталады.
«ҚазАвтоЖол» ұлттық компаниясы ол құрылысына негізінен отандық құрылыс материалдары мен жергілікті жұмыс күші пайдаланылғанын мәлімдеді.
Жол құрылысы үшін 2,4 млн тонна асфальтбетон қоспасы өндіріліп, 1,3 млн текше метр қиыршық тас пайдаланылған. Сондай-ақ, шамамен 1100 бірлік жол-құрылыс техникасы және 1800-ден астам маман тартылған.
Қайта жаңарту аясында 37 көпір, 2 жол өткелі, 2 көлік айрығы, 349 су өткізу құбыры, 5 демалыс алаңы және 2 санитарлық-гигиеналық торап салынған.
«Қалбатау – Майқапшағай» тасжолы еліміздің көлік саласының маңызды бөлігі. Бұл жол Қазақстанның орталық және шығыс өңірлерін Қытай Халық Республикасының шекарасымен байланыстырады. Жобаның жүзеге асырылуы транзиттік әлеуетті арттыруға, өңіраралық және халықаралық байланысты нығайтуға, жол қозғалысы қауіпсіздігін қамтамасыз етуге және азаматтар үшін қолайлы жағдай жасауға мүмкіндік береді. Бұл – еліміздің экономикалық тұрақты дамуына бағытталған жол инфрақұрылымын жаңғыртудың кең ауқымды жұмысының нәтижесі», деді «ҚазАвтоЖол» ұлттық компаниясының басқарма төрағасы Дархан Иманашев.
