Туындыда бірнеше жылға созылған ғылыми зерттеу, далалық экспедициялар, этнографиялық және деректік материалдар қамтылыпты.
Облыстық тарихи-мәдени мұраны зерттеу орталығының басшысы Толыбай Достыбаевтың айтуына қарағанда, 2017 жылы мұнайлы өңірдегі киелі орындарды ғылыми тұрғыдан жүйелеу жұмысы қолға алыныпты. Содан бері далалық зерттеу экспедициялары әр ауданға, әр ауылға барып, киелі орындардың орналасу географиясын түзіпті.
«Біздің экспедициялар фольклорлық, этнографиялық және тарихи деректерді жинақтап, жаңа мәліметтермен толықтырды. Әулие аталар культінің қалыптасу себептері, халықтық ислам дәстүрінің өңірдегі ерекшеліктері сараланды. Далалық зерттеу жүргізу кезінде XIV–XIX ғасырлардағы зираттар мен әулиелердің қабірлері тұрғындар тығыз қоныстанған аймақтарда, атап айтқанда, Жем, Сағыз, Ойыл, Жайық су айдындары жағалауына таяу маңда, Еділ-Жайық өзендері аралығында шоғырланғаны анықталды», дейді Т.Достыбаев.
Шындығында қазақ даласында киелі атауына ие болған әулие-әмбиелер де, тарихи орындар да аз емес. Таңғажайып қасиеті бар аталар туралы ғасырдан-ғасырға, ұрпақтан-ұрпаққа жеткен көне дерек те, аңызға бергісіз әңгіме де көп. Аталған кітап-альбомда осындай тарихи мәліметтер мен аңыз-әңгімелер де берілген.
Атырау облысы
