Дүбірлі додада топ жарды

Облыстық балалар шығар­машылығы орта­лығында өткен «Bala Turkvizyon-Қазақстан» халық­аралық балалар ән байқауының іріктеу кезеңінде жүздеген үміт­керлер арасынан 11 жастағы Дина Диярат топ жарып, Ыстамбұлға жолдама алды. Дүбірлі доданың жеңімпазы шалғайдағы Уәлиханов ауданының Кішкенекөл ауылында тұрады. Кішкентайынан ән айтуға құмар болып өскен тұлымшағы желбіреген Дина сахнаның гүлі десе де болады. Алтынай Жорабаева, Жанар Дұғалова секілді жезтаңдай әнші әпкелеріне ұқсауға тырысып, ұстазы Нұрболат Жанайдың айтқандарын қалт етпейді. Қазақстанның өнерлі жастарына білім, ғылым және мәдениет салалары бойынша қолдау көрсетіп келе жатқан «Жандану әлемі» қорының бастамасымен ұйымдастырылып жүрген аталмыш байқау 8-13 жас аралығындағы дарынды балғындарды жұртшылыққа танытады. Олардың дискіге жазылған әндері білім ошақтарына таратылады. Динаның түркі тілінде де әуелете шырқаған әндері қазылар тарапынан ең жоғары баға алып, жеңімпаз ретінде бірауыздан танылды. – Жас өнерпаз Алматыға «Жұл­дыздар үйінде» кәсіби мамандардан ән айту­дың қыр-сырына үйренеді. Екі апталық шеберлік сабағын алғаннан кейін Түркияның астанасында өтетін «Bala Turkvizyon» байқауының гранд-финалында ел намысын қорғайтын болады, – дейді Динаның тәлімгер-продюсері Әділхан Макин.  Алма ҚУАНДЫҚҚЫЗЫ. Солтүстік Қазақстан облысы.