АСТАНА. 23 наурыз. Бүгін кәсіпқой бокста ұлт намысын асқақтатып жүрген қос бірдей боксшымыз Қанат Ислам мен Жаңқош Тұраров шаршы алаңға шығады. Аталған жекпе-жектер Колумбияда өтеді. Бұл туралы egemen.kz хабарлады.
Екеуінің де қарсыластары колумбиялық боксшылар. Қанат Орландо Де Хесус Эстрадамен WBA Fedelatin тұжырымы бойынша чемпиондық атақты сарапқа салады. Ал Жаңқош Дунис Линан есімді боксшымен күш сынасады. Жекпе-жек кеші бүгін түнде Астана уақытымен сағат 02:00-де басталады. Колумбияның Telecaribe телеарнасы спорттық шараны тікелей эфирде көрсетеді деп жоспарлануда.
Айта кетейік, алғашында Қанат Исламның бүгінгі жекпе-жектегі қарсыласы басқа колумбиялық болған. Яғни, ол чемпиондық атақ үшін Карлос Кальван есімді боксшымен кездесуі тиіс еді. Алайда, келесі қарсыласы ретінде Орландо Эстрада болып бекітілді. Бұл боксшы осыған дейін 17 жекпе-жек өткізіп, 11-інде жеңіске жеткен. Соның тоғызы нокаутпен тіркелген. Алты айқасын тең аяқтаса, бір мәрте жеңілген.
Ал бірінші орта салмақта бокстасатын Қанат бүгінге дейін 18 жекпе-жек өткізіп, барлығында жеңіске жетті. 15 айқасын мерзімінен бұрын аяқтады. WBA Fedelatin тұжырымы бойынша чемпиондық атақ әзірге біздің боксшыда. Сондай-ақ, Қанаттың WBC International Silve тұжырымы бойынша да чемпиондыққа таласатын мүмкіндігі болды. Дегенмен, аталған атақ үшін жоспарланған тартыс өтпей қалды. Бұл айқаста қазақ боксшысы аргентиналық Гуидо Николас Питтомен жұдырықтасуы тиіс еді.
Қанат соңғы жекпе-жегін 2014 жылдың тамыз айында өткізді. Сол тартыста боксшымыз колумбиялық Фидель Монтерросаны бесінші раундта құлатқаны есімізде.
Еламан Қоңыр.
Дерек: egemen.kz.
Сурет: boxingnews.kz.
