Маңғыстауда екпеден зардап шеккендерге Астанадан дәрігерлер келді

АҚТАУ. 23 наурыз. Маңғыстау облысына қызылшаға қарсы екпеден зардап шеккен жасөспірімдерді қосымша қарау үшін Астанадан арнайы төрт дәрігер келді. Бұл туралы egemen.kz тілшісі хабарлады. Маңғыстау облыстық денсаулық сақтау басқармасы басшысы Р.Бектубаевтың айтуынша, Жаңаөзендегі 15 баланың денсаулығын республикалық орталықтардан келген 6 маман қадағалауда. Астанадан келген 4 маман облыс орталығындағы ауруханада жатқан бес науқасты қарамақ. Сондай-ақ, олар Жаңаөзен қаласына барып, екпеден зардап шеккен науқастармен және ата-аналармен жұмыс жүргізбек. Одан бөлек, қиын жағдайларда балаларды жіберетін клиникаларды анықтамақ. Бүгінде Астана қаласына жіберілген 17 баланың 8-і ауруханадан шығарылған. Басқарма басшысы соңғы кездері екпеден соң жиі-жиі талма ұстап, ауруханада қиналып жатқан қыз бала туралы бейнероликке түсінік берді. «Ғаламторда оны қыздың ағасы түсіргендігі туралы айтылған, бірақ оны басқа әйел адам түсірген. Қыздың өзі де, ата-анасы да бұл бейне роликтің түсірілуіне наразы», дейді ол. Гүлайым Шынтемірқызы. Дерек: egemen.kz. Сурет: puzkarapuz.ru.