Астана қаласында Мәжілістегі «Amanat» партиясы фракциясының депутаттары Отан соғысы ардагерлеріне арналған орталық клиникалық госпиталь ұжымымен кездесті. Сенатор Геннадий Шиповских және мәжілісмендер Павел Казанцев, Самат Нұртаза, Марат Башимов, Дәулет Тұрлыханов ондаған жыл бойы Ұлы Отан соғысының ардагерлеріне, тыл еңбеккерлеріне және оларға теңестірілген азаматтарға мамандандырылған көмек көрсететін госпитальдың жұмысымен танысты.
Жиында геронтология мен гериатрияны дербес медициналық бағыт ретінде дамыту, кешенді гериатриялық бағалау мен пәнаралық тәсілді енгізудің маңыздылығы айтылды. «Amanat» партиясы фракциясы басшысының орынбасары Павел Казанцев халықтың қартаюы жағдайында егде жастағы азаматтарға қолжетімді әрі сапалы медициналық көмек көрсететін жүйелі заңнамалық шешімдердің маңызын атап өтті. Кездесуде медицина қызметкерлерін қорғауға бағытталған заңнамалық бастамалар да сөз болды.
Сондай-ақ Мәжіліс депутаттары Шығыс Қазақстан облысының Алтай қаласындағы су желілерінің жаңғыртылуын тексерді. Бүгінде Алтай қаласында су құбыры желілерін жаңғырту жұмысы 95 пайызға аяқталған. Жоба іске қосылғанда 9 420 тұтынушы сапалы ауызсумен қамтылады. Алайда нысанды толық пайдалануға беруге 60 жыл бұрын салынған тозығы жеткен қалаішілік құбырлардың тозығы қолбайлау болып отыр екен. Алтай ауданы әкімінің орынбасары Заңғар Шаухиннің айтуынша, ескі шойын құбырлардың жекелеген бөліктерін ауыстыру үшін шамамен 2 млрд теңге көлемінде қосымша қаржы қажет. Су желілерін жаңғырту жұмысы «Amanat» партиясының сайлауалды бағдарламасы аясында жүзеге асырылып жатыр. Жобаның жалпы құны – 2,6 млрд теңге. Бұл қаражатқа 110,5 шақырым су құбыры желісін тарту көзделген.
Облысқа жұмыс сапарымен келген Мәжіліс депутаттары Ерлан Саиров пен Ұлықбек Тұмашинов жобаны толық аяқтау үшін бюджет қаражатын тиімді жоспарлау мен жұмыстардың сапасына қатаң бақылау қажеттігін атап өтті. «Мыңдаған отбасы таза ауызсумен қамтылады. Сондықтан бұл жобаның сапалы әрі уақтылы аяқталуы маңызды. Бөлінген қаражаттың мақсатты жұмсалуына депутаттық бақылау күшейтіледі», деді Е.Саиров.
Алматы облысына жұмыс сапарымен барған Мәжіліс депутаты, ЖСДП фракциясының мүшесі Асхат Рақымжанов Қонаев қаласының прокуроры Жәнібек Жақаевпен кездесті. Кездесуде «Қапшағай – Алтын Алма» тұтынушылық бақша кооперативіне қатысты көптен бері шешімін таппай келе жатқан мүлік дауы талқыланды. Тұрғындардың айтуынша, ұзындығы шамамен 3,6 шақырым су құбыры желісі олардың өз қаражаты есебінен салынғанына қарамастан, кейіннен күмәнді рәсімдер арқылы үшінші тұлғалардың меншігіне өтіп кеткен. А.Рақымжанов мүлікті ресімдеу кезінде заң талаптарының сақталуына қатысты күмәнді мәселелер бар екенін атап өтті. Кездесу қорытындысында Қонаев қаласының прокуратурасы істі бақылауға алып, барлық мән-жайды қайта зерделейтінін мәлімдеді.
Таразда Мәжіліс депутаттары жаңа мектеп құрылысының барысымен танысты. Тараз қаласында Мәжіліс депутаттары Гүлдара Нұрым, Мұқаш Ескендіров және Әбутәліп Мүтәлі Мәншүк Мәметова атындағы №27 орта мектептің жаңа оқу корпусының құрылыс барысын көрді. Жоба «Amanat» партиясының сайлауалды бағдарламасы аясында жүзеге асырылып жатыр. 600 оқушыға арналған үшқабатты жаңа корпус құрылысы бүгінде 40 пайызға орындалған. Қазір шатыр жабу, ішкі әрлеу және аумақты абаттандыру жұмысы жүргізіліп жатыр. Құрылыс кесте бойынша осы жылдың қараша айында аяқталуға тиіс. Дегенмен мердігер нысанды межелі мерзімге жеткізбей, жаңа оқу жылы басталғанға дейін пайдалануға беруге дайын екенін мәлімдеді.
Мәжіліс депутаты Гүлдара Нұрым білім саласындағы мемлекеттік саясаттың басты өзегі – оқушы мен мұғалімге қамқорлық екенін атап өтті. Оның айтуынша, кейінгі жылдары қабылданған «Педагог мәртебесі туралы» заң нақты нәтижелер беріп отыр: мұғалімдердің орташа жалақысы едәуір өсіп, жүктемесі азайған, еңбегіне деген қоғамның құрметі артқан.
Нысанның жай-күйін көрген депутаттар мектеп инфрақұрылымын дамыту мемлекет үшін басым міндеттердің бірі болып қала беретінін атап өтті. Мұқаш Ескендіровтің айтуынша, өңірдегі оқушылар санының өсуі білім мекемелерін де тездетіп салуды қажет етеді.
Президент тапсырмасының орындалу барысымен танысу мақсатында Мәжіліс депутаты, «Ауыл» партиясының төрағасы Серік Егізбаев Ақтөбе облысына барып, ауыл шаруашылығы саласында атқарылып жатқан жұмысты көрді. Іссапар аясында С.Егізбаев Қарғалы ауданындағы «Степное» ЖШС қызметімен танысты. Мал және егін шаруашылығын қатар дамытып отырған кәсіпорын ауыл тұрғындарын тұрақты жұмыспен қамтып, жергілікті жердің әлеуметтік-экономикалық жағдайын жақсартуға елеулі үлес қосып келеді. Серіктестік – 2002 жылдан бастап элиталықтұқым өндіретін шаруашылық. 250 адамды жұмыспен қамтыған ЖШС 52 мың гектар жерді игеріп отыр.
Серіктестік басшысы, «Ауыл» партиясының мүшесі Аманғос Төлеуов – былтыр Мемлекет басшысының Жарлығымен «Қазақстанның Еңбек ері» атағына ие болған тәжірибелі шаруашылық жетекшісі. Кездесу барысында оның аграрлық сала мен партия жұмысына қосқан үлесі бағаланып, «Ауыл» партиясының 25 жылдық мерейтойлық медалі салтанатты түрде табысталды. Мұндай қадамдар ауыл шаруашылығында адал еңбек етіп жүрген азаматтардың еңбегін бағалап, саланың дамуына деген сенім мен ынтаны күшейте түседі.
