Кездесу барысында Парламентаризм институтының директоры Наталья Пан азаматтардан, сарапшылардан және қоғамдық бірлестіктерден e-Otinish пен eGov электронды платформалары арқылы жолданған ұсыныстар жөнінде баяндама жасады. Оның айтуынша, бастамалар елдегі саяси жүйені жаңғыртуға, мемлекеттік басқару тетіктерін жетілдіруге және билік пен қоғам арасындағы байланысты күшейтуге бағытталған.
Бірнеше айдың ішінде конституциялық реформаға қатысты барлық саяси партиялар, ондаған үкіметтік емес ұйым, бизнес-қоғамдастық өкілдері, құқықтанушы ғалымдар мен салалық сарапшылар өз көзқарасы мен нақты ұсыныстарын ұсынған. Ұсыныстардың бір бөлігі Парламенттің рөлін күшейтуге, өкілеттіктерді қайта бөлуге және саяси институттардың тиімділігін арттыруға қатысты.
Парламенттік реформадан бөлек, Жұмыс тобына азаматтардан мемлекеттік құрылымның жалпы мәселелері, сондай-ақ саяси және қоғамдық институттарды дамыту жолдары жөнінде шамамен 1,6 мың ұсыныс келіп түскен. Бұл бастамалар алдағы реформалардың мазмұнын айқындауда ескерілетіні атап өтілді.
