Биыл сегізінші рет өткізіліп отырған «Мектепке жол» акциясы әлеуметтік жағынан аз қамтылған отбасы балаларына деген көмектің жарқын үлгісі іспетті. Игі бастама Ақмола өңірінде де мемлекеттік қамқорлықпен қатар, бұқаралық сипат алып жатқаны қуанышты.
Облыстық білім басқармасының басшысы Балым Ізбасарованың айтуынша, өткен жылы мұқтаж отбасылардың 6359 баласына бюджеттен 30 миллион теңге қаржы бөлініп, материалдық көмек көрсетілді. Сонымен бірге, әлеуметтік жағдайы төмен отбасылардың 5197 баласына демеушілер тарапынан оқу құрал-жабдықтары мен киім-кешектер алып берілген. Биыл, алдын ала жасалған болжам бойынша, 10637 оқушыға материалдық көмек қажет. Оның ішінде 861 бала мектеп табалдырығын алғаш рет аттағалы отыр. Тамыз айы көңіл өсірерлік шаралармен басталды. Газетіміздің тілшілер қосынына күн сайын дерлік жақсы хабарлар түсіп жатыр. Оның алғашқысын «Акцияны депутаттар бастады» деген атаумен жариялаған едік. Халық қалаулылары белсенділігі әлі де төмендемеуде. Әсіресе, «Нұр Отан» партиясы Ақмола филиалының ұйымдастыруымен «Бақытты балалық» жобасы жұртшылық назарын аударғанын айтқымыз келеді. Ақмола облыс- тық және Көкшетау қалалық мәслихатының депутаттары қазірдің өзінде үш дүркін қайырымдылық кездесуін өткізді. Мәселен, партия филиалы ғимаратының алаңындағы салтанатқа жүзден астам адам жиналды. «Жас Отан» жастар қанатының, «Достар» мәдениет сарайының және «Әулет» мектепке дейінгі оқыту орталығының концерттік бағдарламасы қойылды. Бұл күні депутаттық фракция мүшелері 49 оқушыға 1 миллион теңгенің ақшалай сертификатын үлестірді. Игі істен Қазақстан Парламенті Сенатының депутаты, жерлес жазушы Жабал Ерғалиев те шет қалмай, үш отбасының қуанышын еселегені балалар жанын жадыратты. Ал, облыстық мәслихаттың депутаты Мұрат Теміржанов өз округіндегі 14 балаға қомақты сыйлықтар ұсынды. «Нұр Отан» партиясы об- лыстық филиалы төрағасының орынбасары Ғалым Бекмағамбетов, облыстық мәслихаттың депутаттары Сағынтай Елубаев, Серік Аяғанов, Елена Мащинская, олардың қалалық мәслихаттағы әріптестері Серік Кәкенов, Бауыржан Ғайса, Жанат Әбішов жұртшылықты қайырымдылық пен имандылыққа шақырса, көп балалы ана Наталья Никулина көпшілік атынан алғысын білдірді. Мұндай шаралар облыстың барлық аудандары мен қалаларында да өткізілді. Оған қатысқан 125 «Нұр Отандық» депутат 168 бүлдіршінге 3 миллион 485 мың теңгенің материалдық көмегін көрсетті.
Бақберген АМАЛБЕК, «Егемен Қазақстан».
Ақмола облысы.
