Синоптиктердің болжамынша, елордада мезгіл-мезгіл қар жауып, боран соғып, көктайғақ болуы ықтимал. Оңтүстік-батыстан соққан желдің екпіні кей жерлерде секундына 15–20 метрге жетеді. Алматыда оңтүстік-шығыстан соққан жел күндіз оңтүстік-батысқа ауысып, жылдамдығы секундына 15 метрге дейін күшейеді. Ал Шымкентте жаңбыр жауып, найзағай ойнап, кей уақытта нөсер жаңбыр мен тұман түсуі мүмкін. Солтүстік-батыс желінің екпіні күндіз 15–20 метрге дейін жетеді.
Ақмола облысында қар жауып, боран соғады, көктайғақ болады. Өңірдің батысы мен оңтүстігінде тұман түсуі ықтимал. Оңтүстік-батыс және батыс бағыттан соққан желдің екпіні 15–20 метрге жетіп, түнде кей аумақтарда 25 метрге дейін күшеюі мүмкін. Көкшетауда түнде және таңертең қар жауып, жаяу бұрқасын байқалады.
Ақтөбе облысының батысы, солтүстігі және орталығында түнде қар жауып, жаяу бұрқасын соғады. Күндіз де қар жауып, кей жерлерде қалың қар түседі. Жел оңтүстік-батыстан соғып, кейін солтүстік-батысқа ауысады. Кей мезетте екпіні секундына 23 метрге дейін күшейеді.
Алматы облысының оңтүстігі мен шығысында, сондай-ақ таулы және тау бөктеріндегі аудандарда жел күшейеді. Оның жылдамдығы секундына 15–20 метрге жетіп, күндіз кей уақытта 23–28 метрге дейін үдеуі мүмкін. Қонаев қаласында да осыған ұқсас жел күтіледі.
Атырау облысында жауын-шашын түсіп, негізінен қар жауады, жаяу бұрқасын байқалады. Батыс, солтүстік және оңтүстік аудандарында тұман түсіп, көктайғақ болуы ықтимал. Солтүстік-батыс желінің екпіні күндіз 15–20 метрге, кей жерде 25 метрге дейін жетеді.
Шығыс Қазақстан облысының батысы, солтүстігі және шығысында жаңбыр мен қар аралас жауын-шашын түсіп, жаяу бұрқасын соғып, көктайғақ болады. Кей өңірлерде тұман түсуі мүмкін. Өскеменде де көктайғақ күтіледі.
Жамбыл облысының таулы аймақтарында таңертең және күндіз нөсер жаңбыр жауады. Кей жерлерде тұман түседі. Желдің жылдамдығы секундына 23–28 метрге дейін жетуі ықтимал. Таразда мезгіл-мезгіл тұман байқалады.
Батыс Қазақстан облысының батысы, солтүстігі және оңтүстігінде қар жауып, жаяу бұрқасын соғады. Өңірдің кей бөліктерінде тұман түседі. Оралда күндіз жаяу бұрқасын байқалып, желдің екпіні 15–20 метрге жетеді.
Қарағанды облысында түнде қар жауып, жаяу бұрқасын соғып, көктайғақ болады. Күндіз жауын-шашын қар мен жаңбыр түрінде түседі. Кей жерлерде тұман күтіледі. Қарағанды қаласында түнде қар жауып, боран болуы ықтимал.
Қостанай облысында түнде ауа температурасы күрт төмендеп, кей аудандарда 17–22 градусқа дейін, ал солтүстігі мен батысында 25 градусқа дейін аяз болуы мүмкін. Шығыс және оңтүстік бөліктерінде қар жауып, боран соғып, көктайғақ болады.
Маңғыстау облысының батысы, солтүстігі және орталығында көктайғақ күтіледі. Солтүстік-батыс желінің екпіні күндіз 23–28 метрге дейін күшейеді. Ақтауда да көктайғақ болып, желдің екпіні 15–20 метрге жетеді.
Қызылорда облысының солтүстігі мен оңтүстігінде жауын-шашын түсіп, көктайғақ болуы ықтимал. Кей жерлерде боран соғып, тұман түсуі мүмкін. Желдің екпіні секундына 25 метрге дейін жетеді.
Абай облысының солтүстігі, шығысы және орталығында жаңбыр мен қар аралас жауын-шашын түсіп, жаяу бұрқасын соғып, көктайғақ болады. Семейде күннің екінші жартысында көктайғақ күтіледі.
Жетісу облысының кей аудандарында тұман түседі. Алакөл маңында желдің екпіні 23–28 метрге дейін күшеюі ықтимал.
Ұлытау облысының солтүстігі мен шығысында түнде қар жауып, жаяу бұрқасын соғып, көктайғақ болады. Күндіз де жауын-шашын күтіледі. Жезқазғанда түнде және таңертең тұман түсуі мүмкін.
Павлодар облысында жаңбыр мен қар аралас жауын-шашын түсіп, жаяу бұрқасын соғып, көктайғақ болады. Павлодар қаласында түнде көктайғақ күтіледі.
Солтүстік Қазақстан облысында түнде қар жауып, боран соғып, көктайғақ болады. Кей аудандарда тұман түсіп, желдің екпіні 23–28 метрге дейін жетуі ықтимал. Петропавлда да түнде қарлы боран күтіледі.
Түркістан облысының оңтүстігі мен таулы аудандарында күндіз нөсер жаңбыр жауып, найзағай ойнайды. Кей жерлерде тұман түсуі мүмкін. Түркістан қаласында жаңбыр мен найзағай күтіледі, желдің екпіні секундына 15–20 метрге дейін жетеді.
