4 000 000: Атыраудағы медицина саласына осынша АҚШ долларының медициналық жабдығы тарту етілді

«Теңізшевройл» бірлескен кәсіп­орны жыл сайын Атырау­дың әлеуметтік саласына қолдау білдіреді. Былтырғы қарашада өңірдегі емдеу орындарына меди­циналық құрал-жабдықтар сатып алуға 4 миллион АҚШ долларын бөлген еді. Биылғы жылдың алғашқы жартысында облыстық кардиологиялық орталыққа, облыс­тық балалар ауруханасына, соны­мен бірге, Ма­қат, Индер, Махамбет, Жылыой, Құр­манғазы, Исатай және Қызылқоға аудан­дарының орталық ауруханаларына осы заманғы медициналық құрал-жабдықтар сатып алынды. – Біз заманауи жабдық­тармен жұмыс істеу үшін арнайы оқудан өткен маман­дардың Атырау облысы тұр­ғын­дарының денсаулығын нығай­туға жаңа мүмкіндік алға­нына қуаныштымыз. Енді тұрғындардың, ересектермен қатар, балалардың да басқа жаққа бармай-ақ, өздерінің тұрғылықты жерінде диагностикадан өтіп, қажетті медициналық көмек алуына мүмкіндік туды, – дейді «Теңізшевройл» бірлескен кәсіпорнының бас директоры Тим Миллер. Кардиологиялық орталыққа жүрек соғысының бұзылуын хи­рур­гиялық емдеу және радио­жиілікті аблациялау процедурасын өткізу үшін ST.Jude Medical (АҚШ) фирмасының электрофизиологиялық зертханасын, «Филипс» фирма­сының (Нидерланды-АҚШ) спи­ралдық, 128 кесінді компьютерлік томографты, «Карл Шторц» (Гер­мания) фирмасының лапаро-тора­ко-кардиохирургиялық опе­рация­ларын өткізуге арналған бей­не-эндоскопиялық кешенін, ау­диометриялық модульді және басқа да диагностикалық жабдықтар тапсырылды. Бұл жабдықтарды пайдалануға және қолдануға даяр­лау кезеңінде облыстық және аудандық ауруханалардың 29 қызметкері оқытылыпты. Жолдасбек ШӨПЕҒҰЛ, «Егемен Қазақстан». АТЫРАУ.