ЖАҺАН КЕЗГЕН ЖИҺАНКЕЗДЕР

Нидерландықтар Ұлы Жібек жолымен Қазақстанға келді Сонау Роттердамнан квадро­цикл­мен шыққан екі голландиялық жиһанкез Марк ван дер Верфф пен Сандер Пармантье Ұлы Жібек жолы бойымен Шанхайға кетіп барады. Өткен апта ауа бере олар Қазақ­станға жетіп жығылды. Сая­хат­шылар алты айдың ішінде отан­дарына қайта оралуды межелеп отыр. Осы аралықта голлан­дия­лық­тар 30 мың шақырым жол жүріп өтеді. Жиханкездер осы ұзақ сапар­лары бойында көрген қызықтары мен шыжықтарын, тамаша сәт­тер­ді, табиғат ғажайыптарын бей­не­тас­паға түсіріп келе жатыр екен. Олар өткен бейсенбіде қазақстандық жур­налистермен кездесіп, сапар­лары­ның әсерімен бөлісті. Көзбен көргендерін баяндап, “ХХІ ғасырда Ұлы Жібек жолын зерттеу” тақы­ры­бында сұхбат құрды. Голландия­лық­тар жарты жылдық саяхат барысында жетім балалар үшін құрылған отбасылық SOS Chіldren’s қалашықтарын да аралап келе жатқандарын айтты. “Біздер тек осындай деревня­лар­ға барып қана қоймай, олар үшін қаражат та жинауға ұмтылып келеміз. Балалардың SOS қала­шық­та­ры үшін барынша көп ақша жинауға күш сала отырып, өзіміз­дің ерекше саяхатымызда қиын­дық­тарға душар болсақ та, қоғамда тастанды, жетім балалардың бар екенін еске салуға, осы мәселеге назар аудартуға әрекет етудеміз”, дей­ді Марк ван дер Верфф. Ал Сандер Парментьенің ай­туын­ша, саяхатшылардың сайтына кез келген адам кіріп, оларға әртүр­лі тапсырмалар орындауға ұсыныс беруге болады екен. Мәселен, жетім балалар үшін садақа жинап жүру де сайтқа енген жұртшылықтың жиһан­кездерге жүктеген аманаты. Ұсы­ныстарға дауыс беру SOS қала­шықтарының қорларына жарна аудару арқылы жүргізіледі. Қазірге дейін олар 3 мыңнан астам евро жинаған. Олардың са­пар­ларын бақылап отырғандардың тағы бір тапсырмасы – екі жи­һан­кез тұңғыш рет осындай қашық­тықты квадроциклмен жүріп өте­тіндіктен Гиннестің рекордтар кітабына енулері керек. Осылайша Роттердамнан 1 ма­мырда шыққан саяхатшылар 1 қа­рашада Голландияға қайта оралмақ. Қазақстаннан енді Қытайға бағыт алған екі жиһанкез өздерін қазақ жері осыншалықты ықыласпен, кең дастарқан, тегін жатын орынмен қарсы алады деп күтпегендерін айта­ды. Олардың сапарларын сәтті жылжытып келе жатқан да жо­лай­ғы қайырымды адамдардың ықы­ласы екен. Айнаш ЕСАЛИ, АЛМАТЫ.