Қазақстандық сарбаздар «Танк биатлоны-2015» байқауының финалына шықты

Қазақстан Құрлық әскерлерінің танк экипаждары «Танк биатлоны» байқауының ақтық ойынының төрттігіне кірді. «Алабино» поли­гонындағы жартылай финалдық жарыс екі сайыстан тұрды. Бі­рінші – «Эстафета» жарысын Қазақстанның танкистері қызыл танкте, ал үндістандықтар – жасыл, сербиялықтар – көк танкте, армениялықтар сары танкпен бастады. Екінші жарыста Ресей, Қытай, Тәжікстан және Қыр­ғыз­станның танкистері сайысқа түсті, деп хабарлады Қор­ғаныс министрлігінің баспасөз қызметі. «Жарыс нәтижелері бойынша Ресейдің, Қытайдың, Қазақстанның және Сербияның танкистері финалға шықты», – деді жарыстың бас қазысы генерал-майор Евгений Поплавский. Ал төрешілер: «Ресейлік экипаждар эстафетада 73 минут 30 секунд нәтиже көрсетіп, бірінші орын­ды жеңіп алса, екінші орынды 77 минут 32 секунд нәтижемен қы­тайдың танкистері иеленді, 78 минут 18 секунд нәтиже көрсеткен Қазақстанның танк экипаждары үшінші орынды және төртінші орынды межелі жерге 83 минут 23 секундта жеткен сербтік әскери қыз­метшілер еншіледі», – деп атап өтті. Естеріңізге сала кетейік, эс­тафетаның ережесіне сәйкес, бір танк төрт шақырымды үш мәрте айналып өтеді. Жалпы, әр топ сайыс бойынша тоғыз рет айналып өтуі немесе 36 шақырым жүруі тиіс болатын. Осы аралықта екі шептік атысты жүргізу қосылған. Бірінші учаскеде танкке қарсы қолдан жасалған гранатамен нысананы көздейді. Онда үш нысанаға да дәл тигізу қажет. Әр мүлт кеткен сәтке «жазалау» ретінде 500 метр айналып өту жүктеледі. «Танк биатлоны» байқауының финалы бүгін, 15 тамыз күні өтеді. Жеребелер нәтижелері бойынша Қазақстан Республикасы Қарулы Күштерінің танкистері төртінші жолда сары танктен бастайтын болады. «Егемен-ақпарат».