Синоптиктердің мәліметінше, ел өңірлерінде тұман, найзағай, қатты жел болжанса, шығыс пен орталық аймақтарда су деңгейінің көтерілуі мен су басу қаупі бар.
Найзағай, жаңбыр және қатты жел
Батыс өңірлерде ауа райы тұрақсыз болады. Атырау және Маңғыстау облыстарында жаңбыр мен найзағай күтіледі, кей жерлерде нөсер болуы мүмкін. Желдің жылдамдығы 15-20 м/с дейін күшейеді.
Сондай-ақ екпінді жел Ақтөбе облысында, Ұлытау облысында, Жетісу және Алматы облыстарында да болжанып отыр.
Тұман бірнеше өңірді қамтиды
Солтүстік, шығыс және орталық аймақтарда қалың тұман түседі. Атап айтқанда, Ақмола, Қарағанды, Қостанай, Павлодар, Солтүстік Қазақстан, Шығыс Қазақстан облыстарында, сондай-ақ Абай облысында және Көкшетау, Семей, Павлодар, Петропавл, Өскемен қалаларында тұман болады.
Осыған байланысты түнгі және таңғы уақытта жолдағы көріну деңгейі күрт төмендейді.
Негізгі қауіп – су тасқыны
Ең күрделі жағдай Абай, Шығыс Қазақстан, Павлодар және Қарағанды облыстарында қалыптасуы мүмкін.
Күннің жылынуына байланысты қар қарқынды еріп, өзендерде мұз жүру процесі басталып, су деңгейі көтеріліп келеді. Соның салдарынан өзендердің тасуы, жолдарды су басуы және елді мекендерді су басу қаупі бар. Кей жерлерде су деңгейі қауіпті шекке жақындап қалған.
Оралдағы Жайық өзенінде су деңгейі бір метрге дейін көтерілді
Оңтүстікте өрт қаупі жоғары
Түркістан және Қызылорда облыстарында, Жетісу облысының оңтүстігінде және Қостанай облысының оңтүстігінде жоғары өрт қаупі жарияланды.
