Қытайда жол апатынан еліміздің 2 азаматы қаза тапты

АСТАНА. 27 наурыз. Қытайда Қазақстан азаматтары мінген автобус апатқа ұшырап, 2 адам мерт болды. Бұл туралы mail.ru хабарлады. Бұдан бөлек, автобустағы 19 азамат түрлі жарақатпен ауруханаға жеткізілген. Бұлардың арасындағы 6 адамның жағдайы ауыр. Жапа шеккендердің дені Қазақстан азаматтары. Жол-көлік оқиғасы Қытай жерінде орын алған. Автобус осы елдің компаниясына тиесілі. Куәгерлердің сөзінше, автобус жолдың қарсы бетіне шығып, жеңіл машинамен соқтығысқан. Екі отандасымыз сол жерде қаза тапқан. Ал 19 адам Зимунай елді мекеніндегі ауруханаға жатқызылды. Арасында Қытайда білім алып жүрген студенттер де бар көрінеді. Зардап шеккендер автобус иелерінің әрекетіне наразы. Айтуларынша, көлік компаниясының өкілі ешбір аудармашысыз әлдебір құжаттарға жолаушылардың қолын қойғызбақ болып жүр екен. Семей қаласының тұрғыны, жол апатынан зардап шегіуші Құрмангүл Оразбаева: «Күнде бір қағаздарды алып келіп қол қойыңдар деп мезі етті. Қытай тілін шала-шарпы білетін біреу оқып еді, онда «бар жауапкершілік жолаушыларға жүктеледі» деп жазылған екен. Біздің үкімет тарапынан жәрдем болса дейміз. Аудармашы мен заңгердің көмегі керек», дейді. Айта кетейік, автобус Семейден Үрімшіге бағыт алған екен. Жолдыбай Базар. Дерек, сурет: mail.ru.