Фото: Ашық дереккөз
Науқанның өзегі – әр отбасының күнделікті өміріне «Қауіпсіздік минуты» қағидатын енгізу. Бұл ереже бойынша ата-аналар күн сайын үйді қысқаша тексеріп шығуды әдетке айналдыруы тиіс. Әсіресе, терезе бұғаттағыштарының мықтылығына, сондай-ақ терезе маңында бала шығып кетуі мүмкін жиһаздың болмауына назар аудару қажет. Басты мақсат – тұрмыстық қауіпсіздік дағдыларын қалыптастыру. Науқан аясында өңірлерде бірқатар нақты іс-шаралар қолға алынады.
Оқу-ағарту министрлігінің мәліметінше, білім беру мекемелерінде «Қауіпсіз үй» тақырыбында арнайы сабақтар өткізіліп, ата-аналармен түсіндіру жұмыстары жүргізіледі. Тұрғын үй секторында үй басқарушылары мен белсенді тұрғындардың қатысуымен терезелерге арнайы құлыптар орнату, сондай-ақ ақпараттық парақшалар тарату көзделген.
Ал денсаулық сақтау саласында патронаждық тексерулер кезінде медицина қызметкерлері үйге шағын «қауіпсіздік аудитін» жүргізіп, ата-аналарға нақты ұсынымдар береді.
Бұл бастама мемлекеттік органдар, үкіметтік емес ұйымдар, қоғам және БАҚ өкілдерінің бірлескен жұмысы арқылы жүзеге асады. Ортақ күш-жігердің нәтижесінде ата-аналардың жауапкершілігі артып, әр үйде қауіпсіз орта қалыптастыру көзделіп отыр. Ұзақ мерзімде бұл шаралар балалар қауіпсіздігінің бірыңғай стандарттарын орнықтырып, жарақат алу қаупін жүйелі түрде азайтуға мүмкіндік береді.
