Қаржы вице-министрі Ержан Біржановтың айтуынша, қарапайым тұрмыстық аударымдар тексеріс нысанына іліге бермейді. Мәселен, кофе не түскі ас үшін төлем жасау, достармен бірге жиналып ақша аудару немесе туған күнге қаражат жинау сияқты жағдайлар кәсіпкерлік белгісі ретінде қарастырылмайды. Ол үшін бірнеше нақты шарт қатар орындалуы керек.
Ал күмән тудырған қаржылық операциялар бойынша азаматтарға мамыр айында хабарлама жіберіледі. Сәуір айының соңына дейін салық органдары тексерілуі мүмкін тұлғалардың тізімін жасақтайды. Одан кейін азаматтарға аударымдардың мақсатын түсіндіру үшін 30 жұмыс күні беріледі.
Егер бұл ақша тауар немесе қызмет үшін төлем ретінде алынғаны және одан салық төленбегені анықталса, салық есептеледі немесе айыппұл салынады. Сонымен қатар мұндай азаматтарға жеке кәсіпкер ретінде тіркелу талап етіледі.
