Алмақтың да салмағы бар

Халқымыздың салт-дәстүрі мен өмір сүру дағдысында әкелік қамқорлық бір ауыз тіркес бар. Бұл шын мәнісінде өте мәнді сөз. Өйткені, әкелік қам­қор­лық­қа бөленген әулеттер мен отба­сылардың жәй-күйі төмен болмайды. Әйтсе де, қолдау мен қамқорлық көрсетудің мұндай түрі отбасылық деңгейден аса алмайды. Ендеше, біз осы тіркесті мемлекеттік қамқорлық ұғымымен алмастыршақ ше? Талас жоқ. Оның ауқымы өте кең. Мәні мен мағынасы да өте жоғары, әрі тигізер шапағаты да елдік сипат алады. Бұл арада ең басты айтайын дегенім, біздер отандық кәсіпкерлер қауымы еліміз тәуелсіздік алған кезеңдегі соңғы он жылдың ішін­де мемлекеттің қамқорлығына бөленіп келеміз. Тіпті, символ­дық түрде алғанда бізді Елбасы Нұрсұлтан Назарбаевтың өзі тікелей қанатының астына алды десек артық айтқандық болмайды. Соның арқасында еліміздегі бизнес өкілдері өз өндірістерін құрып, бәсекеге төтеп бере алатындай тауарлар өндіру үшін үлкен мүмкіндіктер алды. Мемлекеттік органдар тарапынан кәсіпкерлік нысандарды тексеруге шектеулер қойып, бірнеше рет оған мораторийлер жариялануы да бізге жасалған мемлекеттік қамқорлық, Елбасының тікелей қолдауы деп түсінуіміз керек. Бұл жөнінде өзінің Қазақстан халқына арнаған Үндеуінде Н.Ә.Назарбаев отандық өндірушілерге қолдау көрсетіп, бизнес үшін қолайлы жағдайлар жасадық деген екен. Ашығы да, ақиқаты да осы. Бұған біз – отандық бизнес өкілдері ризашылықпен қол қоя аламыз. Алмақтың да салмағы бар дегендей ендігі кезекте бізге, яғни ел кәсіпкерлері мен бизнесмендеріне осы қамқорлық пен қолдауға іспен жауап беретін кез келді деп есептеймін. Өйткені, еліміз Дүние­жүзілік сауда ұйымына мүше болып кірген жағдайда Мемлекет басшысы атап көрсеткендей бәсеке одан әрі күшейеді. Менің ойымша, бұған төтеп берудің бір ғана жолы бар. Бұл – сапасы жоғары, бағасы икемді қазақстандық тауарлар өндіруге қол жеткізе білу. Шынтуайтына келгенде, бұл – қолдан келетін іс. Тек бәсекеге сай болу үшін бізге ерік-жігер тұтастығы, іргелі ізденістер, биік міндеттер мен жоғары талаптар үдесінен шығуға септігі тиетіндей мақсаткерлік қасиеттер қажет. Мұның сыртында өндіріс технологиясын ұдайы жетілдіру, бәсекеге төтеп бере алатын тауарлар өндіруге қажетті қондырғылар мен құрал-жабдықтар кешені деген мәселе бар. Республикада Мемле­кет басшысының қолдауымен жасал­ған көптеген бағдарламалар және онда көрсетілген несиелік жеңілдік­тер бұл мәселенің шешімі табы­лып жатқанын көрсетеді. Отандық өндірісшілердің қамқоршысы Нұрсұлтан Әбіш­ұлы Үндеуінде ДСҰ беретін артықшылықтарды пайдалана білетінімізді дәлелдеу қажет екенін айта келіп, бұл Қазақстанның қолынан келеді деп түйін жасады. Нағыз орнықты да сенімді түйін осындай-ақ болар. Кеңес Абсатиров, Батыс Қазақстан облысы кәсіпкерлер палатасының директоры. ОРАЛ.