Оралда адам өлтірген қылмыскерге үкім шықты

ОРАЛ. 28 ақпан. Батыс Қазақстан облыстық қылмыстық істер жөніндегі мамандандырылған аудан аралық сотында адам өліміне әкеліп соқтырған қылмыстық іс қаралды. Бұл туралы Батыс Қазақстан облыстық сотының баспасөз қызметі хабарлады. Аталған соттың үкімімен ауыр қылмыс жасаған Ш.Жұмағалиев ҚР Қылмыстық кодексінің 96-бабы 1-бөлімімен айыпты деп танылды. Соған сәйкес айыптыға 10 жыл бас бостандығынан айыру жөнінде жаза белгіленді. Ол өзінің жазасын қатаң тәртіптегі колонияда өтейді. Қанды оқиға төмендегіше өріс алған. Жоғарыда аталған сотталушы ең алдымен өзінің танысымен бірге арақ ішеді. Қуаты жоғары ішімдіктің уыты бойларына тарай бастағаннан кейін екеуі өзара қатты сөзге келіп қалады. Осы кезде өзінің іс-қимылына есеп беруден қалған Ш.Жұмағалиев үстелдің үстіндегі ас үй пышағына жармасады. Келесі бір сәтте осы пышақпен жәбірленушінің мойын тұсына ауыр соққы жасайды. Танысы сол жерде есінен танып қалады. Әйтсе де көзі қарайған басбұзар мұны да місе тұтпай, жәбірленушінің тамағы мен күретамырын кесіп жібереді. Ауыр жарақаттан танысы сол жерде өліп кетті. Темір Құсайын. Дерек: Батыс Қазақстан облыстық сотының баспасөз қызметі. Сурет: sud.gov.kz.