Ақтөбеде футбол билеттері ғаламтор арқылы сатыла бастады

АҚТӨБЕ. 30 маусым. Енді кез келген ақтөбелік, тіпті қала қонағы Қобыланды батыр атындағы орталық стадионда өтетін теңбіл доп додасына билеттерді үйден шықпай-ақ, ғаламтор арқылы сатып ала алады. Бұл туралы egemen.kz тілшісі хабарлады. Интернеттің осынау игілігі 30 маусым күні іске қосылды. Қобыланды батыр атындағы орталық стадионның директоры Қажымұқан Демеуовтің айтуынша, аталған электрондық жүйенің өзі бір жылға жуық уақыт аралығында жасалған. Жан-жақты сынақтан өткен жаңа жобаға сәйкес, енді ғаламтор қолданушысы www.aktobe-stadion.kz сайтына кіріп, артынша онда тіркелгеннен кейін билетті сатып ала алады. Ғаламтор сайттарында әр қолданушыға бір-бір билеттен сатылады. Тиісінше, оның барлық жеке мәліметтері жүйеге түсіп тұрады. Кейін алда-жалда әлгі адам тәртіп бұзса, болмаса мүлде келмей қалса, бәрі белгілі болып отырады. Стадионның жанкүйерлер отыратын бөлігіне де бейнекамера қойылады. Онлайн-сатылымды жүргізу үшін сайтқа тіркелу қажет. Ол үшін әр адам жылына 200 теңге төлеуі тиіс. Сатыбалды Сәуірбай. Дерек, сурет: egemen.kz.