Заманға сай мамандар тартылмақ

Кеше Орталық коммуникациялар қызметінде Білім және ғылым вице-министрі Е.Иманғалиев, Денсаулық сақтау және әлеуметтік даму вице-министрі Б.Нұрымбетов, Л.Н.Гумилев атындағы ЕҰУ ректоры Е.Сыдықовтың қатысуымен «Индустрияландыруды кадрлармен қамтамасыз ету» тақырыбында баспасөз мәслихаты өтті. Конференция барысында вице-министр Е.Иманғалиев жоғары және жоғары оқу орнынан кейінгі білім саласында жо­баларды заманға сай кадрлармен қамту инно­вациялық сипаттағы білім беру бағ­дар­ламалары есебінен жүргізілетін­дігін айтып, 2015-2017 жылдары білім беру бағ­дарламаларын әзірлеуге әр жыл сайын­ 962,1 млн. теңге қаржы қарастырыл­ған­­дығын алға тартып, республи­калық бюд­­жет есебінен 2015 жылы шетелдік ға­лым­­­дарды шақыруға 998,8 млн. теңге мөл­­ше­рінде, сондай-ақ академия­лық ұтқыр­лыққа 590 млн. теңге бөлінгенін мәлім етті. «2015 жылдың 1 қыркүйегінен бас­тап оқу процесіне енгізілетін оқу бағ­дарламаларын келісу бойынша жұмыс берушілермен, кәсіподақтармен байланыс артуда. Он іріктелген колледждердің алтауы Дүниежүзілік банк қаржысы есебінен іске асырылатын техникалық және кәсіптік білімді жаңғырту жобасы бойынша грант алушылар болып табылады. Осы жоба аясында колледждер 425 млн. теңге тұратын жабдықтармен жарақталған», – деді Е.Иманғалиев. «Нұрлы Жол» Жаңа Экономикалық Саясатын және Қазақстан Республикасын индустриялық-инновациялық дамыту­дың 2015-2019 жылдарға арналған мемлекеттік бағдарламасын іске асыру мақсатында базалық жоғары оқу орындарының және колледждердің даму бағдарламасы әзірленгенін де атап өтті. Осы бағдарламаға және елімізді индустрияландырудың екінші бесжыл­дығының басымдықтарына сәйкес 2015-2017 жылдары білікті кадрлар даярлау іске асады екен. Мемлекеттік бағдарламаның басым салалары: металлургия, мұнай-газ химиясы, электр­энергетика, жеңіл және тамақ өнеркәсібі, машина жасау, информациялық-комму­никациялық технологиялар, тағы басқа. Ал Денсаулық сақтау және әлеуметтік даму министрлігінің деректеріне сәйкес, 2015-2019 жылдары аралығында жалпы саны 257 өңірлік және республикалық жобалар іске асырылатын болады. Мұндағы кадрларға деген жалпы қажеттілік бүгінгі күнде 46,6 мың адамды құрап отыр екен. Мәселен, техникалық және кәсіптік білім беру саласында «Кәсіпқор» холдингі мен 10 колледж арасында дамыту ісі бойынша шарттар жасалған. 2017-2018 жылдарда 10 колледжге әрі қарай енгізу үшін жұмыс берушілердің қа­тысуымен тағы 16 оқу бағдарламасы әзір­­­ленбек. 2015 жылдан бастап 2 колледж­ осы бағдарламаларды оқу процесіне енгізеді. 2015-2016 оқу жылының басынан бастап базалық жоғары оқу орындарында магистранттар жаңа білім беру бағдарламалары бойынша білім алатын болады. Зертханаларды құруға 10 млрд. теңге қарастырылса, оның 3 млрд. теңгесі соңғы екі жылда, 4 млрд. теңге 2017 жылы игерілетін көрінеді. Раушан ТӘУІРХАНҚЫЗЫ, журналист.