Ақын саябағы

Еліміздегі етек-жеңі жинақы шағын шаһарлардың ішінде келбетті көркімен бірден баурап алатын қала болса, ол – Зайсан. Сауыр тауының етегінде самаладай жарқырап жатқан Зайсан қаласының кіре берісінде Абай саябағы орналаспақ.   Таяуда аудандағы сапары­мыздың аясында ұлы ақынның атындағы саябақ жобасымен таныстық. Оған тапсырыс беруші – Зайсан қаласының әкімдігі. Мердігері – жергілікті «СМУ Шығыс» ЖШС. Аталған жобаға жергілікті бюджеттен 64 млн. теңге қаржы бөлінді. Оған саябақ аумағында субұрқақ, гүлдер мен көгалдарды суа­ру желілері, электр шамдары мен демалыс орындары орнатылады. Сондай-ақ, осы жерде ең үлкен нысан – Хан шатыр салынады. Ал саябақтың алдына ақынның мүсіні орналасады. Асық, бәйге, қыз қуу сынды қазақтың ұлттық құндылықтары шағын мүсіндік композициялармен көрініс табатын болады. Сонымен бірге, мұнда жоспар бойынша мұз айдыны, ролик тебуге арналған алаң, қазақтың ұлттық нақыштағы жәдігерлері мен бұйымдарын саудалауға арналған дүкен бой көтермек. Көркемдік үшін декоративті ағаштар отырғызылады. 25 адамды жұмыспен қамтып отырған құрылыс алаңында қызу жұмыс жүріп жатыр. Жұмыс күзде аяқталмақ. – Қазіргі кезде саябақтың ішіндегі жолдар мен алаңқайларға тас төсеніштер төсеу және саябақ аумағын қоршау жұмыстары жүргізілді. Біздің мақсатымыз – Абай саябағы арқылы тәлімдік-тәрбиелік маңызы бар алаң құру. Бұл қаламызға келген қонақтар мен қала тұрғындарының сейілдеп, сергитін тамаша орындарының бірі болады деген ойдамыз, – деді аудандық сәулет-құрылыс, тұрғын үй, коммуналдық шаруашылық, автокөлік жолдары және жолаушы көлігі бөлімінің басшысы Асхат Өтебаев. Айта кеткен абзал, исі адамзатқа ортақ Абай хакімнің ұрпақтарының бірі – Күлзипа Исрайылқызы Зайсан қаласында тұрып, былтыр дүниеден өткен болатын. Осы орайда ұлы Абай­дың 170 жылдық мерейтойы­на орай салынып жатқан саябақ­тың бір бұрышында ақынның зай­сандық ұрпағына да бір көрнекі ақ­параттық орын беру жөніндегі ұсы­нысымызды жеткіздік. Думан АНАШ, «Егемен Қазақстан». Шығыс Қазақстан облысы, Зайсан ауданы.